साँझ उपत्यकासहित देशका पहाडी भेगमा हल्का वर्षा

१८ चैत, काठमाडौं । बुधबार साँझ उपत्यकासहित देशका पहाडी भेगमा हल्का वर्षा भएको छ । काठमाडौं उपत्यकाको नगरकोट, काभ्रेको धुलिखेल लगायतका ठाउँमा हल्का वर्षा भइरहेको जल तथा मौसम पूर्वानुमान महाशाखाले जनाएको छ ।

महाशाखाकी मौसमविद शान्ति कँडेलका अनुसार उपत्यकासहित कास्की लगायतका जिल्लामा पनि वर्षा भइरहेको छ । यो वर्षा क्षणिक भएको मौसम महाशाखाले जनाएको छ । वर्षा भएपनि तत्काल काठमाडौं उपत्यका लगायतका ठाउँमा देखिएको वायु प्रदूषण भने हट्ने सम्भावना छैन ।

यो वर्षाले वनमा लागेको डढेलो निभाउन नसक्ने महाशाखाले जनाएको छ । क्षणिक वर्षा भएकाले डढेलो निभाउन पर्याप्त नहुने उनको भनाई छ । वर्षापछि फेरि डढेलोका कारण धुवाँ र धुलोका कणहरु वायुमण्डलको सतहमा रहने भएकाले पूर्ण रुपमा तत्काल प्रदूषण नहट्ने बताइएको छ ।