सुरुङ र पुलको दोस्रो प्याकेज ठेक्का रद्द, ठेकेदार छनौट

१९ चैत, काठमाडौं । नेपाली सेनाले निर्माण गरिरहेको काठमाडौँ–तराई द्रुतमार्गमा दोस्रो प्याकेजका लागि पूर्व योग्यतामा छनौट भएको पोली चङदा इञ्जिनियरिङको छनौट रद्द गरी नयाँ प्रक्रियामा शुरु गर्न संघीय संसदको सार्वजनिक लेखा समितिले निर्देशन दिएको छ ।

नेपाली सेनाले दुई लटमा पुल र सुरुङको ठेक्का लगाउन पहिलोका लागि चाइना स्टेट कन्स्ट्रक्सन इञ्जिनियरिङ कर्प र पोली चङदा इञ्जिनियरिङलाई पूर्वयोग्यतामा छनौट गरेको थियो । दोस्रो प्याकेजमा पोली चङदा इञ्जिनियरिङलाई मात्र पूर्वयोग्यतामा छनौट गरेकोमा प्रतिस्पर्धा हुन नसकेको निष्कर्षसहित त्यसलाई रद्द गरी पूर्वयोग्यता छनौटका लागि निर्देशन दिइएको लेखा समितिले जनाएको छ ।

इपीसी ‘इञ्जिनियरिङ्ग, प्रोक्योरमेन्ट एण्ड कन्स्ट्रक्सन’ अन्तर्गत नेपाली सेनाले ठेक्का प्रक्रिया अघि बढाउन खोजेको भएपनि यसमा सार्वजनिक खरिद अनुगमन कार्यालयले यससम्बन्धि मापदण्ड, निर्देशिका र कार्यविधि निर्माण नगरिसकेकाले त्यी दस्तावेज समेत तयार गरी सार्वजनिक खरिद गर्ने निकायहरूलाई उपलब्ध गराउन निर्देशन दिएको छ ।