औपचारिक रुपमा राष्ट्रपतिले गरिन मेलम्ची पानीको वितरण

२० चैत, काठमाडौं । राष्ट्रपति विद्यादेवी भण्डारीले आज मेलम्ची खानेपानी आयोजनाको पानी वितरणको शुभारम्भ गरेकी छन् । भृकुटीमण्डमा आयोजित एक समारोहका बीच राष्ट्रपति भण्डारीले पानी वितरणको शुभारम्भ गरेकी हुन् ।

भृकुटीमण्डपमा निर्माण गरिएको ढुङ्गेधाराको स्वरुपमा रहेको धाराको टुटी खोलेर राष्ट्रपति भण्डारीले खानेपानी वितरणको औपचारिक सुरुआत गरेकी छिन् । भृकुटीमण्डपमा मेलम्चीबाट आएको पानी २४ सैं घण्टा वितरण हुने गरी धारा निर्माण गरिएको छ । सार्वजनिक उपभोगका लागि यहाँ सधैं पानी छाडिने बताइएको छ।

सिन्धुपाल्चोकको मेलम्ची खोलाको पानी काठमाडौं आएपछि चैत १५ देखि वितरण शुरु गरिएको छ । अहिले  काठमाडौं उपत्यकाका १५ हजार घरधुरीमा परीक्षणका लागि मेलम्चीको पानी वितरण गरिएको छ । मेलम्चीको पानी काठमाडौं उपत्यकाको चक्रपथभित्र वितरण गरिने छ ।