ओली निरंकुश : रावल

२० चैत, काठमाडौं । नेकपा एमालेको असन्तुष्ट पक्षले अध्यक्ष एवं प्रधानमन्त्री केपी ओली अराजक र निरंकुश सत्ता सञ्चालनतर्फ अग्रसर भएको भन्दै सशक्त प्रतिकार गर्ने निचोड निकालेको छ ।

राजधानीको एउटा पार्टी प्यालेसमा जारी स्थायी कमिटी बैठकमा सहभागी नेताहरुले ओलीविरुद्ध पार्टी पंक्तिमा अझ सशक्त र प्रभावकारी कदम चाल्नुपर्नेमा जोड दिए ।
वरिष्ठ नेताद्वय झलनाथ खनाल र माधवकुमार नेपाल पक्षधर नेताहरुको जारी स्थायी कमिटी बैठकमा अब ओलीविरुद्ध चौतर्फी घेराबन्दी गर्दै वृहत्त संगठन निर्माणमा अग्रसर हुनुपर्ने धारणा बनेको छ ।

बैठकको बीचैमा बाहिर निस्किएका नेता भीम रावलले भने – आफू लगातय नेताहरुमाथि ओली पक्षले गरेको कारबाही गैरकानूनी र हाँस्यास्पद छ । त्यस्तो कारबाहीको कुनै तुक छैन ।

पार्टीको नीति र सिद्धान्त विपरीत गरिएको कथित कारबाहीलाई हामीले गलत ठहर गरेका छौं – उनले भने –ओलीको कदम निरंकुशता लाद्ने र तानाशाही बन्ने प्रयास हो, त्यो सफल हुन सक्दैन ।

नेकपा एमाले पार्टीको रक्षाका लागि आफूहरुले निर्णायक कदम चालेको भन्दै नेता रावलले अब विस्तारै ओलीविरुद्ध समानान्तर संगठन देशव्यापी रुपमा तयार हुने जानकारी दिए ।

एमाले संस्थापनपक्षले नेता रावलका साथै वरिष्ठ नेता नेपाल, उपमहासचिव घनश्याम भूषाल र स्थायी कमिटी सदस्य सुरेन्द्र पाण्डेलाई पार्टीबाट ६ महिनाका लागि निलम्बन गरेको छ ।