समर्थन फिर्ताको पत्र संसद सचिवालयमा बुझाउँदै माओवादी केन्द्र

२२ चैत,काठमाडौं । नेकपा माओवादी केन्द्रले सरकारलाई दिएको समर्थन फिर्ता गरेको औपचारीक जानकारी आज संसद सचिवालयलाई दिने तयारी गरेको छ । प्रधानमनमन्त्री केपी शर्मा ओलीले पटक पटक समर्थन फिर्ता लिन चुनौति दिइरहेको वेला  नेपाली कांग्रेस प्रधामन्त्रीको राजीनामा माग्ने र नयाँ सरकार निर्माणका लागि पहल थाल्ने निर्णय गरेको दुइदिन पछि माओवादी केन्द्र समर्थन फिर्ताको निर्णयमा पुगेको हो ।

माओवादी केन्द्रले आजै संसद सचिवलायमा समर्थन फिर्ता लिएको पत्र बुझाँउने तयारी गरेको माओवादी केन्द्रका नेताले जानकारी दिए । त्यसअघि अविश्वासको प्रस्ताव दर्ताका लागि  कांग्रेस, माओवादी केन्द्र र जसपा नेताहरु बीच छलफल हुने बताइएको छ ।

यता संसद् सचिवालयमा सरकारलाई दिएको समर्थन फिर्ता लिएको चिठी दर्ता गर्ने सूचना पाएका प्रधानमन्त्री  ओलीले देश  मध्यावधि निर्वाचनको संकेत गरेका हुन्। सरकार परिवर्तन गर्न दलहरूबीच सहमति जुट्दै गर्दा प्रधानमन्त्री ओलीले अहिलेको प्रतिनिधिसभाको अंकगणित बदल्न मध्यावधि निर्वाचनमा जानुपर्ने संकेत गरेका हुन।

प्रधानमन्त्री ओलीले सत्ता सहकार्यका लागि जनता समाजावादी पार्टी (जसपा) सँग प्रस्ताव गरे पनि त्यो सार्थक बन्न सकेको छैन। सत्ता सहकार्य कोसँग गर्ने भन्ने विषयमा जसपाभित्र आन्तरिक विवाद भएपछि उसले ओली नेतृत्वको सरकारलाई समर्थन गर्न सकेको छैन। जसपाभित्र अध्यक्ष उपेन्द्र यादव र नेता डा। बाबुराम भट्टराई ओली नेतृत्वको सरकारलाई समर्थन नगर्ने र अर्का अध्यक्ष महन्थ ठाकुर र नेता राजेन्द्र महत्तो समर्थन गर्ने कित्तामा देखिएका छन् ।

यहीबीच प्रमुख प्रतिपक्षी दल नेपाली कांग्रेसले प्रधानमन्त्रीलाई हटाउन माओवादी केन्द्रलाई साथ दिने र नयाँ सरकार बनाउन अग्रसरता लिने निर्णय गरेपछि प्रधानमन्त्री ओली निकै आक्रोशित बनेका छन्। हिजो बालुवाटारमा भएको कार्यक्रममा प्रधानमन्त्री ओलीले आफूलाई दिएको समर्थन फिर्ता लिन चुनौति दिदै समर्थन फिर्ता लिए राजीनामा दिने बताएका थिए ।