ग्याँस सिलिन्डरभित्र लुकाएर लागुऔषध तस्करी गर्ने २ जना पक्राउ

२२ चैत, काठमाडौं । नेपाल प्रहरीले खाना पकाउने ग्याँस सिलिन्डरभित्र लुकाएर लागुऔषध तस्करी गर्ने २ जनालाई पक्राउ गरेको छ ।
प्रहरीले काठमाडौंको फर्पिङबाट ग्याँसमा लुकाएर लागुऔषध तस्करी गर्ने दुई जनालाई पक्राउ गरेको हो ।

पक्राउ पर्नेमा वीरगञ्जको जगनाथपुर घर भएका तेजामनु गद्दी र अब्दुल्लाह गद्दी छन् । वीरगञ्जबाट काठमाडौं आउँदै गरेका उनीहरुले बा।३६ प ७१३७ नम्बरको मोटरसाइकलमा सिलिन्डरभित्र लागु औषध ल्याएका थिए ।

प्रहरीले सिलिन्डरबाट ५ सय ६८ एम्पुल डाईजेपाम, ५ सय ७७ एम्पुल फेनारगन र ५ सय ७१ एम्पुल नुर्फिन बरामद गरेको छ ।
७ केजी ग्यास अट्ने सानो सिलिन्डरको पिँध काटेर लागु औषध लुकाएर काठमाडौं ल्याएको प्रहरी जनाएको छ ।