एमालेमा प्रवेश भएसंगै लुम्बिनीका दुई सांसदको पद गुम्दै

२३ चैत, बुटवल । लुम्बिनी प्रदेशसभा सदस्यद्वय दधिराम न्यौपाने र दिनेश पन्थीले सांसद पद गुमाउने भएका छन् । नेकपा माओवादी केन्द्र छाडेर एमालेमा प्रवेश गरेका उनीहरुलाई माओवादी केन्द्रले कारवाही गर्दै छ ।

नेकपा एमालेमा प्रवेश भएसंगै उनीहरुमाथि कारवाही गर्नका लागि माओवादी केन्द्रले प्रदेश सभालाई पत्र पठाईसकेको छ । सोमबार बस्ने प्रदेशसभा बैठकमा सभामुखले उनीहरुमाथि कारवाहीको पत्र पढेर सुनाउने भएका छन् ।

सोमबार बस्ने बैठकमा सभामुखले सो पत्र पढेर सुनाउने कार्यसूची रहेको र सभामुखले सो पत्र पढेर सुनाएसँगै दुवै सांसदको पद गुम्ने प्रदेशसभाका प्रवक्ता हरिहर पोख्रेलले बताएका छन् ।