माओवादीका सांसदले गरे बाग्मती प्रदेशसभा बैठक अवरुद्ध

२४ चैत,मकवानपुर । आज बसेको बाग्मती प्रदेशसभाको बैठक प्रमुख प्रतिपक्षी दल नेकपा माओवादी केन्द्रले अवरुद्ध गरेको छ । लामो समयपछि बसेको प्रदेशसभा बैठकमा माओवादी केन्द्रले विभिन्न मागहरु राख्दै संसद अवरुद्ध गरेको हो ।

माओवादी केन्द्रले मुख्यमन्त्री डोरमणि पौडेल विरुद्ध दर्ता भएको अविश्वासको प्रस्ताव विभिन्न बहानामा सरकारले छलफलमा ल्याउन नदिएको, पुस १० गते पश्चात सरकार परिवर्तन भएपछि सत्तापक्षले एकलौटी ढंगबाट नीति तथा कार्यक्रम र बजेट पठाउने गर्ने काम गरेको र सरकारले प्रदेशमा छलफल बिना नै विद्युतीय बस संचालनमा ल्याउन लागेको भन्दै तत्काल त्यस सम्बन्धमा उचित जवाफ माग गर्दै संसद अवरुद्ध गरेको हो ।

त्यस्तै केन्द्रले मुख्यमन्त्री विरुद्ध दर्ता भएको अविश्वासको प्रस्तावमा सभामुखले संसदमा तत्काल छलफलमा ल्याउन पनि भनेको छ । माओवादी केन्द्रका प्रदेशसभाका सांसदहरुले उठेर बैठक अवरुद्ध गरेका थिए । माओवादी केन्द्रका सांसदहरुको अवरोध पछि प्रदेशसभाका सभामुख सानुकुमार श्रेष्ठले भोलि चैत्र २५ गते दिउँसो ११ बजे बस्नेगरी बैठक स्थगित गरेका छन् ।