नियुक्ति र सपथको पर्खाइमा पदमुक्त मन्त्रीहरु ! 

२७ चैत, काठमाडौं । प्रतिनिधिसभा सदस्यता खारेजीमा परेपछि मन्त्रीबाट पनि पदमुक्त भएका निवर्तमान मन्त्रीहरु टोपबहादुर रायमाझी, प्रभु साह, लेखराज भट्ट र गौरीशंकर चौधरीलाई प्रधानमन्त्री केपी शर्मा ओलीले पुन: नियुक्ति गर्ने र सपथ दिलाउने बिषय अझै टुग्गो लागेको छैन ।

नेपाल कम्युनिष्ट पार्टी (माओवादी केन्द्र)ले सांसदबाट पदमुक्त गरेसँगै पदमुक्त भएका चार जानलाई पुन मन्त्री बनाउन चाहे उनिहरुलाई पुन मन्त्री  नियुक्त र फेरी सपथ गराउनु पर्ने संवैधानिक बाध्यता छ । “उनीहरू नै फेरि मन्त्री नियुक्त हुन्छन् कि हुदैनन् कुनै टुग्गो लगेको छैन । पार्टीमा छलफल पनि होला । यति वेला सम्म नियुक्ति र  सपथ कहिले हुन्छ भन्ने टुंगो भएको छैन”, प्रधामन्त्री ओलीको सचिवालय एक सदस्यले जानकारी भने ।

तर पदमुक्त भएका मन्त्रीहरुले भने आफुहरु नियुक्ति र सपथको खबर कुरिरहेका बताएका छन् ।  संघीय सांसद नरहेका व्यक्तिलाई प्रधानमन्त्रीले ६ महिनाका लागि मन्त्री बनाउन सक्ने संवैधानिक व्यवस्था छ। उनिहरुलाइ नै पुन दोहोराउने भए प्रधानमन्त्री केपी शर्मा ओलीले अब त्यही व्यवस्थाअनुसार मन्त्री बनाउनु पर्ने छ। यसअघि उनले माओवादी छोडेर आएका मणि थापा र दावा लामालाई यही व्यवस्थाअनुसार मन्त्री बनाएका छन्।