खनाल-नेपाल पक्षको विराटनगरमा समानान्तर कमिटी गठन

२८ चैत, मोरङ । नेकपा एमालेको झलनाथ खनाल–माधवकुमार नेपाल पक्षले शुक्रबार मोरङ जिल्ला र विराटनगर महानगरमा समानान्तर कमिटी गठन गरेको छ । चन्द्रवीर राईको अध्यक्षतामा ३ सय २५ सदस्यीय जिल्ला कमिटी र पारुल क्षेत्रीको अध्यक्षतामा १ सय ७५ सदस्यीय विराटनगर महानगर कमिटी गठन गरेको हो ।

जिल्ला कमिटीको उपाध्यक्षमा डा। उद्धव पोखरेल, अर्का उपाध्यक्षमा चण्डी राई, सचिवमा राजन केसी, सहसचिवमा राजन केसी र अर्का सहसचिवमा वासिम आलम र कोषाध्यक्षमा विश्वनाथ राय चयन भएको छ । बाँकी ३ सय १७ जना सदस्य चयन गरिएको अध्यक्ष राईले बताए ।

यस्तै, महानगर कमिटीको उपाध्यक्षमा खेम तिम्सिना, सचिवमा मिरा दाहाल र सहसचिवमा योगेशराज भण्डारी चयन भएको अध्यक्ष क्षेत्रीले बताए । उनले बाँकी १ सय ७१ सदस्य रहेको र त्यसमध्ये पछि अन्य पदाधिकारी चयन गरिने बताए । जिल्ला र महानगर कमिटीलाई माधवकुमार नेपालले पद तथा गोपनीयताको सपथ गराएका थिए ।