ओली नक्कली राष्ट्रवादीः रावल

२९ चैत, काठमाडौं । नेकपा एमालेका नेता भीम रावलले प्रधानमन्त्री केपी ओलीको नक्कली राष्ट्रवादको धोती खुस्किएको बताएका छन् । एमाले भित्र फरक धार बोकेका कारण कारबाहीमा परेका रावलले अब भने ओलीको निरंकुशता लामो समय नटिक्ने बताए ।

सुदूरपश्चिमको राजधानी धनगढीमा पत्रकारहरुसँग कुरा गर्दै नेता रावलले भने – अस्ती राष्ट्रपति विद्यादेवी भण्डारीले वितरण गरेको मान पदवीमा नेपालको पुरानै नक्सा राखिएछ, संविधानले चाहिं नेपालको नक्सा चुच्चे देखाएको छ ।

नक्सा सच्याइएपनि ओलीले भारतीय गुप्तचर निकाय रअ प्रमुख सामन्तकुमार गोयलसँग मध्यरातमा गरेको मन्त्रणापछि सबैतिरबाट हटाइएके उनको आरोप छ । नेता रावलले भने – हामीले संसदबाट पारित गरेको लिम्पियाधुरा,लिपुलेक , कालापानी कता पुगेछ अब भनेर खोज्दा त प्रधानमन्त्रीले सिरानीमा लुकाएर राखेको पो रहेछन् ।

गृहमन्त्रालयले पहिल्यै घोषित पुरस्कार भएकाले नक्सा समेट्न नपाएको रुञ्चे तर्क गरेकोमा नेता रावलले आपत्ति जनाउँदै भने – निर्णय जहिले भएपनि वितरण त अहिले भएको हो नि ? यस्तो हास्याँस्पद तर्क दिएर नेपालीलाई ढाँट्ने ?

बरु ओलीको नक्कली राष्ट्रवादको पगरी चाहिं अब खुस्किएको छ , उनी नक्कली राष्ट्र हुन् , सारा दुनियाँलाई थाहा छ नि– उनले भने । एक अर्काे प्रसंगमा उनले आफूलगायत नेकपा एमालेका मूल प्रवाहका नेतालाई ओलीले कारबाही गर्ने भनेको गँजेडी गफ मात्र भएको बताए । ओलीले हामीलाई कारबाही गर्ने हैसियत कसरी पाए ? पार्टी बनाउने हामी अनि हामीलाई नै कारबाही गर्ने उनी?–नेता रावलको आपत्ति थियो ।