कर्णाली प्रदेशसभाको सातौं अधिवेशन वैशाख ३ गते आह्वान गर्न सिफारिस

३० चैत, काठमाडौं । कर्णाली प्रदेशसभाको सातौं अधिवेशन २०७८ वैशाख ३ गते आह्वान गर्न कर्णाली प्रदेशको मन्त्रिपरिषदले सिफारिस गरेको छ। आइतबार बसेको मन्त्रिपरिषदको बैठकले संसद आह्वान गर्न प्रदेश प्रमुखलाई सिफारिस गरेको हो। यसअघि कात्तिक ९ गते प्रदेश सभाको छैटौं अधिवेशन अन्त्य भएको थियो।

७ महिनापछि सातौं अधिवेशन आह्वा गर्न लागिएको हो। वैशाख ३ गते दिउँसो २ बजे पहिलो बैठक बस्नेछ।  पछिल्लो राजनीतिक घटनाक्रमले कर्णाली सरकार अल्पमतमा छ । एमालेले मुख्यमन्त्री महेन्द्रबहादुर शाहीलाई दिएको समर्थन फिर्ता लिएपछि ३ गते बस्ने बैठकलाई विशेष महत्वका साथ हेरिएको छ ।

उक्त बैठकबाट शाहीले राजीनामा दिन्छन् वा विश्वासको मत प्राप्त गर्छन् भन्ने बारेमा धेरैको ध्यान केन्द्रित छ। सर्वोच्चको फैसलापछि नेकपा एकता भंग भई एमाले र माओवादी केन्द्र पूर्ववत् अवस्थामा फर्किएपछि कर्णालीमा रहेको माओवादी नेतृत्वको सरकार पनि अल्पमतमा परेको हो ।