संक्रमण बढेसंगै नाका निरीक्षणमा पुगे काठमाडौंका सीडीओ

३१ चैत, काठमाडौं । कोरोना संक्रमण दर बढ्दै गएपछि काठमाडौं प्रमुख जिल्ला अधिकारी कालीप्रसाद पराजुली नागढुंगा नाकामा निरीक्षण गर्न पुगेका छन् । उनले त्यहाँ चेकजाँच र एन्टिजेन परीक्षण भए नभएकोबारे निरीक्षण गरेका हुन् ।

प्रमुख जिल्ला अधिकारी कालीप्रसाद पराजुलीसंगै निरीक्षणमा काठमाडौं प्रहरी प्रमुख एसएसपी अशोक सिंह पनि गएका गएका थिए । पराजुलीले थानकोटमा रहेको हेल्थ डेस्कलाई पनि प्रभावकारी बनाइएको साथै नाकामा आउने हरेक बसलाई चेकिङ गरेर मास्क लगाए नलगाएको समेत हेर्न भनेको बताएका छन् । नाकामा अहिले एन्टिजेन परीक्षणका लागि जनशक्ति कम भएको र त्यसको लागि स्वास्थ्य मन्त्रालयलाई जानकारी गराएको उनले बताएका छन् ।

हाल नाकामा एन्टिजेन परीक्षणका लागि जिल्ला जनस्वास्थ्य कार्यालयको टोली खटिएको छ । यसअघि २३ चैतमा बसेको जिल्ला कोभिड–१९ संकट व्यवस्थापन समितिको बैठकले नाकामा अनिवार्य एन्टिजेन परीक्षण गर्ने निर्णय गरेको थियो ।