नयाँ बर्षमा पूर्वराजाको शुभकामना: फुटेर हैन, जुटेर शक्ति संरक्षण गर्न’ आग्रह

१ वैशाख, काठमाडौं । पूर्वराजा ज्ञानेन्द्र शाहले पछिल्लो राजनीतिक परिदृश्यलाई संकेत गर्दै ‘फुटेर हैन, जुटेर शक्ति संरक्षण गर्न’ आग्रह गर्दै त्यसमा नेपालको कल्याण हुने बताएका छन्।

नयाँ वर्ष २०७८ को पूर्वसन्ध्यामा ज्ञानेन्द्रले जारी गरेको शुभकामना सन्देशमा हरेक नयाँ वर्षमा सुख, समुन्नति, शान्ति र सन्तुष्टिको अपेक्षा गरिए पनि समयक्रममा ती सबै चकनाचुर भइरहेको उल्लेख गरेका छन्।

‘राजनीतिक नैतिकता, जनताप्रतिको उत्तरदायित्व, निष्ठा र इमान्दारी हामी सबैमा हुनुपर्दछ। यसका निम्ति आपसी भाँडभैलो, अनमेल र द्वन्द्वको अन्त्य हुनुपर्छ अनि समन्वय, सामञ्जस्य पनि रहनुपर्दछ’, शुभकामना सन्देशमा भनिएको छ ।

पूर्वराजा ज्ञानेन्द्रले टाठाबाठा मात्र मोटाउँदै जाने र निमुखा सर्वसाधारणको जीवनस्तर कहिल्यै नउठ्ने गतिविधि र पद्धति त्याग्न पनि आग्रह गरेका छन्।