कांग्रेस सभापति देउवा र जसपाका नेताहरुबीच भेटर्वाता

१ वैशाख, काठमाडौं । नेपाली कांग्रेसका सभापति शेरबहादुर देउवाले जनता समाजवादी पार्टी ‘जसपा’का नेताहरु उपेन्द्र यादव र डा.बाबुराम भट्टराईसँग मंगलबार साँझ छलफल गरेका छन्। हिजो साँझ देउवाले आफ्नो निवास बुढानिलखण्ठमा यादव र भट्टराई बोलाएर छलफल गरेका हुन्।

बुढानिलखण्ठ स्रोतका अनुसार नयाँ सरकार गठनमा अनिर्णित भएको आरोप लागिरहेका बेला देउवाले यादव र भट्टराईलाई नयाँ सरकार गठनमा आफूहरुलाई साथ दिन र उनीहरुको पार्टीका महन्थ ठाकुर र राजेन्द्र महतो खेमालाई पनि सहमत गराउन आग्रह गरेका थिए।

ठाकुर र महतोको खेमाले कांग्रेसले आफूहरुसँग सल्लाह नै नगरी केपी ओलीलाई प्रधानमन्त्रीबाट हटाउने र आफ्नो नेतृत्वमा सरकार गठनका लागि पहल गर्ने निर्णय गरेको भन्दै सार्वजनिकरुपमै असन्तुष्टि जनाएका छन्।

आफ्नै नेतृत्वमा सरकार गठन गर्न पहल गर्ने निर्णय गरेको कांग्रेसका सभापति देउवाले केही दिन पहिले तीन दलको बैठक राखेर धारणा मागेका थिए । त्यसपछि जसपाका पदाधिकारीहरुबीच दुई दिन छलफल भए पनि कुनै निर्णय हुनसकेको छैन ।

भट्टराई र यादव कांग्रेस र माओवादी केन्द्रसँग गठबन्धन गर्ने पक्षमा रहे तापनि पार्टीमा निर्णय गराउन सकेका छैनन् । अध्यक्ष महन्थ ठाकुर र वरिष्ठ नेता राजेन्द्र महतो, एमाले अध्यक्ष एवं प्रधानमन्त्री ओलीसँग संवादमा छन् ।

उनीहरुले जसले माग सम्बोधन गर्छ, उसैलाई सम्बोधन गर्ने बताउँदै आएका छन् । प्रधानमन्त्री ओलीले पनि मुद्दा फिर्तालगायतका माग सम्बोधन गर्ने आश्वासन दिएका छन् ।