कुकुरको हत्या गर्नेलाई कारबाहीको माग गर्दै प्रदर्शन

१ बैशाख,काठमाडौं । बुधबार पशु अधिकारकर्मीहरुले कुकुरको हत्या गरेको विरोधमा प्रदर्शन गरेका छन् । उनीहरुले राजधानीको माइतीघरमा भेला भएर कुकुरको हत्या गर्नेलाई कडा कारबाहीको माग गर्दै प्रदर्शन गरेका हुन् ।

केही दिनअघि काभ्रेको धुलिखेल नगरपालिका–४ स्थित २८ किलोमा दुईजना पुरुषले कुकुरलाई हिर्काएर हत्या गरेका थिए । बिजुलीको पोलमा कुकुरलाई बाँधेर दुईजना पुरुषले कोदालो र फलामको रडले टाउकोमा हिर्काएर कुकुरको हत्या गरेको भाइरल भिडियोमा देखिन्छ ।

विभिन्न नारा अंकित प्लेकार्डसहित भेला भएका उनीहरुले ‘खैरे’ नामको सो कुकुरको विभत्स हत्याको कडा शब्दमा विरोध गर्दै पशु अधिकारको रक्षा गर्न माग गरेका छन् ।