कोरोना कहरको मारमा अभिभावक

२ वैशाख, काठमाडौं । कोरोना कहरको दोस्रो लहरले छिमेकी भारतीय जनजीवन फेरि थलिएको छ । दैनिक झण्डै दुई लाख मानिस संक्रमित हुन थालेपछि धेरै राज्यले प्रतिबन्धात्मक अवस्थाको घोषणा गरेका छन् । राजधानी दिल्लीमा कर्फ्यू नै लगाइएको छ । अब सरकारले लकडाउन नै गर्नुपर्ने अवस्था चित्रण गरिरहेको छ ।

कोरोनाको दोस्रो लहर नियन्त्रण बाहिर गएको भन्दै राज्य सरकार चिन्तित छ । मुख्यमन्त्री अरबिन्द केजरीवालले त अब कोरोनाबाट बच्न लकडाउनको विकल्प नरहेको प्रतिक्रिया दिन थालेका छन् । भारतमा यस्तो अवस्था भएका बेला नेपालमा पनि कोरोना संक्रमितको संख्या ह्वात्तै बढ्न थालेको छ । दैनिक पाँच छ सयकोे संख्यामा संक्रमितको संख्या थपिएका छन् ।

पछिल्लो समय युके भेरिएन्ट भाइसर खतरनाक रुपमा आएको र यसले बालबालिकालाई बढी असर गरेको तथ्याङ्क बाहिरिएको छ । सरोकारवालाहरुले यस्तो अवस्थामा विद्यालय बन्द गर्नुपर्ने सुझाव दिएका छन् । खासगरी स्वास्थ मन्त्रालयले कम्तिमा ३० दिन विद्यालय बन्द गरेर भाइरसको चेन तोड्नुपर्ने सुझाव दिएको छ । तर विद्यालय सञ्चालकहरु भने यसको विपक्षमा देखिएका छन् । उनहरुको विरोधले गर्दा सरकारले उचित निर्णय लिन सकिरहेको छैन । यही मुद्धालाई लिएर दुई पटक मन्त्रिपरिषद बैठक बस्यो । तर निर्णय लिन भने सकेको छैन ।

धेरै विद्यालयमा संक्रमित विद्यार्थी फेला परेका छन् । तर सरकारले यथोचित निर्णय लिन सकिरहेको छैन । त्यसैले अब कसरी अगाडि जाने भन्ने विषयमा अभिभावक सबैभन्दा अन्योलमा परेका छन् । विद्यालय सञ्चालकको चिन्ता विद्यार्थीको स्वास्थ भन्दा आर्थिक उठ्ती रोकिनेमा बढी केन्द्रित छ । त्यसैले उ विद्यालय बन्द गराउनु हुँदैन भन्नेमा जोड दिन्छ । तर अभिभावक भने विद्यालयले भरपर्दाे स्वास्थ सजगता तयार नगरेकाले केटाकेटी पठाउने की नपठाउनेमा अन्योलग्रस्त छन् ।

सही निर्णय सही समयमा भएन भने फेरि नसोचेको भयावह अवस्था सामना गर्न तयार हुनुपर्ने छ । सरकारले यस्ता विषयमा अलि संवेदनशील भएर सही निर्र्णय लिइदिएन भने ठूलै समस्या आउने सूम्भावनालाई नकार्न सकिन्न ।