ओलीको हार सुरु: प्रचण्ड

५ वैशाख, भरतपुर । पूर्व प्रधानमन्त्रीसमेत रहेका माओवादी केन्द्रका अध्यक्ष पुष्पकमल दाहाल ‘प्रचण्ड’ आज अलि खुलेर भन्दै थिए– अब ओलीजी ( प्रधानमन्त्री केपी ओली ) को हारको श्रृँखला सुरु भयो । यो क्र अब देशव्यापी हुनेछ, यसको दोस्रो प्रहार केन्द्रीय सरकारमा हुँदैछ ।

गृह जिल्ला चितवनको माडी नगरपालिकाको नयाँ भवन उद्घाटन गर्न यहाँ आइपुगेका प्रचण्डले भने– अब राजनीतिमा लागेको तुवाँलो फाट्न थाल्यो , कर्णाली प्रदेशको सन्देश देशव्यापी जानेछ । कर्णाली प्रदेश सरकार गिराउन खोज्दा ओलीले आफ्नै दलका चारजना सांसद् नै गुमाउनुपरेको प्रसंग झिक्दै भने–ओलीको पार्टीमा अब भूकम्प आउने छ । देशैभरि ओलीको पतनयात्रा सुरु भइसक्यो ।

पुष ५ गते प्रतिनिधिसभा विघटन गरेर देशलाईं अँध्यारो सुरुङमा हाल्न खोजेका ओलीको हार फागुन ११ गतेको पुनस्थापनाको फैसलाबाटै भएपनि प्राविधिक रुपमा उनी अनैतिक ढंगले सत्तामा बसेको आरोप प्रचण्डले लगाए । सर्वाेच्चले फैसला बदर गरिसक्दासमेत नकचरो भएर सत्तामा टाँस्सिएका ओलीले अब भने हारको स्वाद चाख्ने भन्दै अब नेपाली कांग्रेस र जनता समाजवादी दलसँग गठबन्धन बनाएर ओलीलाई सत्ताबाट च्यूत गर्ने बताए ।

यो गठबन्धनको थालनी भइसकेको छ – उनले भने लगत्तै ओलीको सरकार ढल्नेछ र गण्डकी अनि लुम्बिनी सरकार पनि अब टिक्नेवाला छैन । ओलीले आफूलाई सडकमा पु¥याएको भन्दै खुशियाली मनाएकोमा अब ती दिन गएको टिप्पणी प्रचण्डले गरे । अब सडकमा जाने पालो ओलीको हो – उनले भने ।