जसपा कार्यकर्ता रिहा गर्ने मन्त्रिपरिषदको निर्णय

६ वैशाख, काठमाडौं । सरकारविरुद्ध अविश्वास प्रस्ताव दर्ताको अन्तिम तयारी भइरहेको बुझेपछि प्रधानमन्त्री केपी ओलीले आज केही महत्वपूर्ण निर्णय लिएका छन् । जसमा संसद्को चालू अधिवेशन अन्त्य गर्नेदेखि सत्ताको साँचो बोकेको जनता समाजवादी दलले उठाएका केही मागसमेत पूरा गरिदिएको छ ।

आज बिहान प्रधानमन्त्रीको बालुवाटारस्थित सरकारी निवासमा बसेको मन्त्रिपरिषद बैठकले जसपालाई खुसी पार्न बन्दी जीवन विताइरहेका २०८ जनालाई रिहाई गर्ने निर्णय गरेको छ । ओली सरकारसँग लामो समयदेखि मधेस आन्दोलन लगायत मधेस केन्द्रित गतिविधि गर्दा पक्राउ परेका आफ्ना कार्यकर्ताको रिहाई गर्न जसपाले आवाज उठाइरहेको थियो ।

अब रेशम चौधरीको रिहाई र बृषेशचन्द्र लालले तयार गरेको रिपोर्ट समेत सावर्जनिक गर्ने तयारीमा सरकार रहेको छ । यति गर्दा जसपाको समर्थन पाउने ओलीको आशा रहेको छ । यद्यपि सरकारको पछिल्लो निर्णयबारे जसपाका अध्यक्ष उपेन्द्र यादवले यसबारे आधिकारिक रुपमा केही जानकारी नभएको तर सरकारले बन्दी रिहाईको निर्णय गरेको भए धन्यवाद दिने बताए ।

सरकारले यस्तो निर्णय गरेकै भरमा जसपाले ओलीलाई समर्थन नगर्ने उनले प्रष्ट पारे । हाम्रा कार्यकर्तामाथि झुठा मुद्धा लगाएर फसाएकाले उनीहरुको रिहाई गर्नु सरकारको कर्तव्य भएको टिप्पणी गर्दै अध्यक्ष यादवले ओली सरकार कुनै पनि हालतमा अब नटिक्ने बताए ।

प्रतिगमनकारी भूमिकामा रहेका ओलीलाई हामीले बोक्ने भन्ने प्रश्नै नउठ्ने भन्दै उनले यसबारे छिट्टै टुंगो लाग्ने बताए । संभावित अविश्वास प्रस्ताव छल्न ओलीले संसद् अधिवेशन अन्त्य गरेपनि विशेष अधिवेशन डाकिने उनले जानकारी दिए ।