विष्णु रिजाल पनि ओली क्याम्पमा

६ वैशाख, काठमाडौं । नेकपा एमाले भित्रको आन्तरिक विवादमा बाजी मार्न दुबै समूह सक्रिय छन् । पार्टी अध्यक्षसमेत रहेका प्रधानमन्त्री केपी ओलीको ध्याउन्न जसरी भएपनि माधवकुमार नेपाललाई एक्ल्याउने देखिन्छ । यसका लागि ओली पक्षले नेपाल निकट नेता कार्यकर्ता फकाउने वा तर्साउने कामलाई तीब्रता दिइरहेका छन् । ओलीको यो प्रयास केही हदसम्म कारगर पनि साबित भएको छ ।

नेपाल निकट सांसद् तथा केन्द्रीय सदस्यहरुलाई भेट्ने र आफूतिर तान्न ओली पक्ष लागिपरेको छ । यसैक्रममा आज बालुवाटारमा बोलाइएको महाधिवेशन आयोजक कमिटी बैठकमा नेपालका अत्यन्तै विश्वास पात्र विष्णु रिजालसमेत सहभागी भएका छन् ।

प्रधानमन्त्री ओलीले नेता रिजालसँग पछिल्ला दिन चरणबद्ध छलफल भइरहेको बालुवाटार स्रोतले बतायो । त्यसैले रिजाल ओली क्याम्पमा पुगेका अनुमान गरिएको छ । नेता नेपाल प्रधानमन्त्री हुँदा रिजाल प्रेस सल्लाहकारका रुपमा संलग्न थिए । साथै, नेकपाको हरेक विवादमा उनले नेता नेपाललाई साथ दिंदै आएका हुन् ।