नक्कली शैक्षिक प्रमाणपत्र पेश गरेर डाक्टर बनेका सात जना पक्राउ

६ वैशाख, काठमाडौं । नक्कली शैक्षिक प्रमाणपत्र पेश गरेर एमबिबिएस पढेका र डाक्टर बनेका सात जनालाई प्रहरीले पक्राउ गरेको छ। उनीहरु एसएलसीको नक्कली सर्टिफिकेट पेश गरेर डाक्टर बनेको प्रहरीले बताएको छ ।

पक्राउ पर्नेमा रुकुम पश्चिमको चौरजहारी अस्पतालमा कार्यरत डा. दिपेन्द्र गौतम सुभाष प्रताप साह, मोहम्मद शाहिद राजा, अखिलेश कुमार देव, पल्लवी सिंह, फराज हुसेन खाँ र मोहमद सद्दिक रहेका छन् ।

उनीहरु बंगलादेशमा एम बीबीएस अध्ययन गर्न जान एसएलसीको मार्कशिटमा योग्यता नपुगेपछि नाम, जन्ममिती, प्राप्तांक लगायत विवरण किर्ते गरेर नेपाल मेडिकल काउन्सीलबाट स्विकृत लिएको अभियोगमा पक्राउ परेको प्रहरीले जनाएको छ ।

पश्चिम रुकुम लगायतका ठाउँबाट पक्राउ परेका ७ जना नक्कली डाक्टरलाई प्रहरीको केन्द्रीय अनुसन्धान ब्यूरो ‘सिआइबी’ले आज पत्रकार सम्मेलन गरि सार्वजनिक गरेको हो । सीआईबीले यसअघि पनि ‘अपरेशन क्वाक’ सञ्चालन गरेर नक्कली चिकित्सकलाई नियन्त्रणमा लिएर कानूनी दायरामा ल्याएको थियो ।