निरन्तर संक्रमण बढ्दै, एकैदिन १९३ बालबालिका संक्रमित

७ वैशाख, काठमाडौं । नेपालमा मंगलबार एकैदिन १९३ जना बालबालिकामा कोरोना भाइरस संक्रमणको पुष्टि भएको छ । स्वास्थ्य तथा जनसंख्या मन्त्रालयका अनुसार ९ वर्ष उमेर समूहका ४३ बालबालिका र १० देखि १९ वर्ष उमेर समूहका १५० जना बालबालिकालाई संक्रमण भएको हो ।

पछिल्लो समय शहरी क्षेत्रका शैक्षिक संस्थाहरु कोरोना संक्रमणको ‘हटस्पट’ बन्न थालेपछि भौतिक रुपमा पढाई नगर्न सरकारले निर्देशन दिइसकेको छ। तीव्र गतिमा फैलने युके भेरिएन्टको असर बालबालिकालाई देखिन थालेपछि सरकारले केहीदिन अघि यस्तो निर्णय गरेको हो।

आज पछिल्लो २४ घण्टामा थप १७३६ जनामा कोरोना भाइरस संक्रमण पुष्टि भएको छ । मन्त्रालयका अनुसार ८०५५ पीसीआर परीक्षणमा १६६७ र ६८३ एन्टिजेन परीक्षणमा ६९ गरी १७३६ जनामा संक्रमण पुष्टि भएको हो ।

त्यस्तै कोरोना भाइरस संक्रमणका कारण थप ११ जनाको मृत्यु भएको छ । पछिल्लो २४ घण्टामा २५१ जना कोरोना भाइरस संक्रमणमुक्त भएका छन् ।