समर्थन फिर्ता लिने जिम्मेवारी प्रचण्डलाई

८ वैशाख, काठमाडौं । माओवादी केन्द्रले केपी ओली नेतृत्वको सरकारलाई दिएको समर्थन फिर्ता लिने जिम्मेवारी अध्यक्ष पुष्पकमल दाहाल प्रचण्डलाई दिएको छ। पार्टी स्थायी कमिटीको बुधबार बसेको बैठकले यस्तो निर्णय गरेको प्रवक्ता नारायणकाजी श्रेष्ठले बताए।

बैठकले सिंगो राष्ट्रको एकता र राष्ट्रिय स्वाधीनताको रक्षा, लोकतान्त्रिक शक्तिहरूको एकता, संविधान र लोकतन्त्रको रक्षा, सच्चा कम्युनिस्टहरुको एकता र कम्युनिस्ट आन्दोलनको रक्षालाई केन्द्रबिन्दुमा राखेर नीति कार्यक्रम र योजना बढ्ने निर्णय गरेको प्रवक्ता श्रेष्ठले बताए।

बैठकमा विधान संशोधन कार्यदलले पेस गरेको संशोधित विधानको मस्यौदामाथि विभिन्न नेताहरुले आआफ्नो धारणा राखेका थिए। प्रस्तावित विधान संशोधन मस्यौदाका आधारमा संगठनात्मक कार्यायोजना केही दिनपछि बस्ने स्थायी कमिटी बैठकमा प्रस्तुत गरिने उनले बताए।

यसैगरी अध्यक्ष दाहालले संगठनात्मक कार्यदलले संगठनात्मक कार्ययोजना तयार गर्ने अवधिमा राजनीतिक प्रतिवेदन तयार पार्नेछन्। त्यसलाई स्थायी कमिटीमा पेस गरिने र त्यसलाई केन्द्रीय कमिटी बैठकमा प्रस्तावका रुपमा पेस गरिने प्रवक्ता श्रेष्ठले जानकारी दिए।

बैठकले कोभिड-१९ बाट बच्न सचेतता अपनाउन आमजनतालाई अपिल गरेको छ। कोरोनाका कारण प्रस्तावित केन्द्रीय कमिटीको बैठक निश्चित नगरिएको उनले बताए।