ओली र नेपालबीचको भेटवार्ताले सकरात्मक परिणाम निस्केला त ?

८ वैशाख, काठमाडौं । नेकपा एमालेका अध्यक्ष केपी ओली र नेता माधव नेपालबीचको भेटवार्ता सकिएको छ । काठमाडौँको नक्सालस्थित होटल मेरियटमा दुई नेताबीच एक्लाएक्लै भेटवार्ता भएको हो । भेटपछि बाहिरिएका माधवकुमार नेपालले कुनै प्रतिक्रिया नदिने बताएका छन् ।

बुधबार साँझ साढे पाँच बजेदेखि उनीहरुबीच झण्डै साढे दुई घण्टा छलफल भएको छ। छलफलपछि बाहिरिने क्रममा नेता नेपालले आफू पक्षका साथीहरुसँग छलफल गरेर मात्र प्रतिक्रिया दिने बताए। प्रधानमन्त्री ओलीका आर्थिक सल्लाहकार मोती दुगडले नेताहरुको अनुहार प्रफुल्लित देखिएको हुँदा छलफल सकारात्मक भएको बताए।

तर उनी वार्तामा सहभागी भने भएका थिएनन्। एमालेमा ओली र नेपाल–खनाल पक्षबीच विवाद चर्किएर पार्टी फुटको संघारमा पुगेका बेला नेपाल र ओलीबीच भएको भेटलाई अर्थपूर्ण रुपमा हेरिएको छ।

बुधबार मात्रै नेपाल–खनाल समूहका नेता योगेश भट्टराई बालुवाटार पुगेर पार्टीलाई फुटबाट जोगाउन अध्यक्ष ओलीलाई आग्रह गरेका थिए। त्यसपछि नेपाल, खनाल र बामदेव गौतमबीच पछि छलफल भएको थियो। मेरियट होटलको ९०१ नम्बर कोठामा  ओली र नेपालबीच भएको छलफलले सकरात्मक परिणाम निस्केला त ?