प्रचण्ड र नेपालले टाउकोमा हानेर रन्थन्याउने गराएको ओलीको टिप्पणी

९ बैशाख, काठमाडौं ।  प्रधानमन्त्री केपी ओलीले नेकपामा रहँदा तत्कालीन अध्यक्ष पुष्पकमल दाहाल ‘प्रचण्ड’ र वरिष्ठ नेता माधjकुमार नेपालले आफूलाई ‘टाउकोमा हानेर रन्थन्याउने नीति’ लिएको टिप्पणी गरेका छन् । प्रधानमन्त्री ओलीले प्रचण्ड र नेपालहरुमा चरम महत्त्वकांक्षा​ र संकीर्ण मानसिकताले आफूलाई कम्युनिस्ट पार्टीको साधारण सदस्यबाटै हटाउने दुष्प्रयास गर्दै टाउकोमा हान्ने नीति अबलम्वन गरेको बताएका हुन् ।

पार्टी स्थापना दिवसको अवसरमा बल्खुमा केन्द्रीय पार्टी कार्यालय शिलान्यास गर्दै अध्यक्ष एवम प्रधानमन्त्रीओलीले भने ‘उनीहरु ओलीलाई पत्तासाफ बनाइयो, भित्तामा टँसाइदिन्छु, धूलोमा मिलाइदिन्छु, धूलोमा मिलाए; भन्दै हिडे । म माथि किन त्यस्तो आक्रमण थियो भने टाउकोमा हान्ने हो भने शरीर सग्लै भएपनि रन्थनिने भयो नि । त्यसरी टाउकोमा हान्ने नीति उनीहरुमा रह्यो र नेतृत्वदेखि शीर्ष नेतालाई कारवाहीमा पारियो ।’

आफू ५६ वर्ष अगाडिदेखि कम्युनिस्ट पार्टीको सदस्य रहेको उल्लेख गर्दै कठिन परिस्थितिमा आन्दोलनलाई माथि उठाउन भूमिका निर्वाह गरेकाले बिचलित नभएको ओलीले बताए ।

ओलीले माधव नेपालले देशभर नयाँ पार्टी खोलेर हिँडेको भएपनि भरसक अहिलेपनि आफूहरु सम्झाउने प्रयासमा रहेको बताए । ‘हाम्रा विरुद्ध कति गरे ? तर अहिले उनीहरुले यति उपद्राे गर्दा पनि, अर्को पार्टी देशभर खोलेर हिँड्दा पनि, अहिलेसम्म हामीले कारवाही नगरेर सम्झाइबुझाइ गर्ने प्रयास गरिरहेका छौँ,’ ओलील भने ।

अहिले पनि भरसक पार्टीमा क्षति नहोस् भनेर आफ्नो प्रयास अहिलेपनि उनीहरुलाई सम्झाउनेमा र सच्याउनेमा रहेको ओलीको भनाई छ ।