आज पनि भेट्न ओलीको नेपाललाई प्रस्ताव

९ वैशाख, काठमाडौं । हिजोबाट आइसब्रेक भएको एमाले अध्यक्ष केपी ओली र नेता माधवकुमार नेपाल आज पनि भेटघाट गर्दैछन् । हिजो साँझ नक्सालस्थित मेरियट होटलमा दुई घण्टा छलफल गरेका नेताद्वयले कुनै ठोस विषयमा निश्कर्ष ननिकालेपनि फेरि भेट्न वाचा गरेका थिए ।

आज बिहान दुबै नेताहरुले सार्वजनिक रुपमै केही उपलव्धि नभएको भन्दै वार्ता केवल औपचारिक रहेको संकेत गरेका थिए ।
तर भर्खरै बालुवाटारबाट आजपनि भेटौं भन्ने प्रस्ताव आएको छ–कोटेश्वर निकट स्रोतले भन्यो – कहाँ र कतिबेला भेट्ने भन्ने चाहिं खुलाइएको छैन ।

प्रधानमन्त्रीसमेत रहेका अध्यक्ष ओलीले भोलिका लागि केन्द्रीय कमिटी बैठक डाकेका छन् । उक्त बैठकमा सहभागी भएर आफ्नो प्रष्टीकरण राख्न ओलीले सुझाव दिएको भएपनि नेता नेपालले अस्वीकार गरेका थिए । भोलिको बैठकमा आफूहरु नजाने पक्षमा अडिग रहेको नेपाल पक्षल प्रष्ट पारेको छ ।