सांसद पद खारेजी रोक्न नेपाल पक्षले दिएको रिटमाथि सुनुवाई हुँदै  

१२ बैशाख, काठमाडौं । नेकपा एमाले माधव पक्षका नेताले सर्वोच्चमा दिएको रिटमाथि आज सुनुवाई हुँदैछ । नेकपा एमालेबाट निलम्वनमा परेका चारजना नेताले आफूहरुसहित २७ जना सांसदको पद खारेजी हुने प्रक्रिया रोक्न र पुनःस्थापित एमालेको केन्द्रीय कमिटी बैठक बोलाउने अन्तरिम आदेश माग गर्दै सर्वोच्च अदालतमा रिट दिएका थिए ।

माधवकुमार नेपाल, सुरेन्द्र पाण्डे, घनश्याम भुसाल र भीम रावलको तर्फबाट संयुक्त रुपमा पेश गरिएको १४ बुँदे मागसहितको रिटमाथि न्यायाधीश प्रकाश ढुंगानाको इजलासमा सुनुवाई हुने भएको हो । एमाले नेताहरुको रिट ढुंगानाको इजलासको अन्तिमतिर राखिएको छ ।

रिट निवेदकले आफूहरुमाथि गर्न लागिएको निष्काशनको कारवाही उत्प्रेषण, प्रतिषेधको आदेशद्वारा खारेजको माग गरेका छन् । ती नेताहरुले निर्वाचन आयोगमा कायम रहेको एमालेकाे अभिलेख र विवरणमा कुनै परिवर्तन नगर्नु नगराउनु भन्ने परमादेश आयोगका नाममा समेत जारी हुनुपर्ने माग गरेका छन् ।

यता एमालेको ओली पक्ष भने अदालतबाट कुनै आदेश आउनपूर्व नै माधव पक्षका सांसदहरुलाई निलम्बनको तयारी गरेको छ । जसका लागि बालुवाटारमा बैठक जारी छ ।