एमालेमा थप सांसदलाई कारबाही हुँदै

१२ बैशाख, काठमाडौं । दुई दिनअघि मात्रै बसेको नेकपा एमाले महाधिवेशन आयोजक कमिटीको बैठक आज विहान एक्कासी बोलाइएपछि ठूलै निर्णय गर्न लागिएको अनुमान धेरैले गरेका छन् ।

प्रधानमन्त्रीसमेत रहेका एमाले अध्यक्ष केपी ओलीले आज बिहान बैठक बोलाएपनि अजेण्डा भने बताइएको छैन । त्यसैले आयोजक समितिमा रुपान्तरित केन्द्रीय कमिटी सदस्यहरु ओलीको सरकारी निवास बालुवाटार पुगेका छन् । बैठक जारी छ ।

बैठकमा के विषय उठाइयो भन्नेबारे अहिल्यै सार्वजनिक भइसकेको छैन । तर असन्तुष्ट पक्षमा नेताहरुलाई कारबाही प्रकृया अघि बढाउन खोजिएको बुझिएको छ । स्रोतका अनुसार, नेपाली कांग्रेस र नेकपा माओवादी केन्द्रले ल्याउने तयारी गरेको सरकारविरुद्धको अविश्वास प्रस्तावलाई बल पुग्ने गरी असन्तुष्ट पक्षले भड्काएकोले थप सांसद्हरुलाई निलम्बन गर्ने तयारी छ । आजको बैठकले त्यही नै काम गर्ने गर्ने हो ।

असन्तुष्ट पक्षका नेताहरु माधवकुमार नेपाललगायतले सर्वाेच्चको फैसला विपरित ओली चलेको भन्दै अर्काे रिट दायर गरेका छन् । उक्त रिट उपर आजै वहस पैरवी हुँदैछ । न्यायधीश प्रकाशकुमार ढुँगानाको इजलाशमा पेशी चढेको छ । तर अग्राधिकार नपाएकाले आजै पालो नआउन सक्ने अवस्था छ ।

कदाचित पालो आयो भने अन्तरिम आदेश जारी हुन सक्ने कानूनविद्वको भनाई रहेको छ । किनभने ओलीको विरोध गरेकै भरमा कसैलाई संसद् सदस्यबाट हटाउन सक्ने कानूनी वा संवैधानिक अवस्था छैन । त्यसको भनक ओलीले पाइसकेका छन् । त्यसैले अदालतको फैसला आउन अघि नै उनी कारबाही गर्न हतारिएको स्रोतको भनाई छ ।

ओलीले सोधेको स्पष्टीकरणको अधिकांशले जवाफ दिइसकेका छन् । केहीले भने अझै बुझाएका छैनन् । अझैपनि जवाफ नबुझाउनेहरुलाई समेत के गर्ने भनेर आजै टुंगो लगाउने पक्षमा ओली रहेका छन् । संभवतः आजै बस्ने मन्त्रिपरिषद बैठकले कोरोना संक्रमण तीब्र भएका सहरी क्षेत्रमा बन्दाबन्दी घोषणा गर्ने संभावना औंल्याइएको छ । त्यसैले पनि आफू पक्षीय नेताहरुलाई सामुहिक रुपमै राखेर निर्देशन दिने उद्येश्यले पनि आजको बैठक डाकिएको हुनसक्ने स्रोतको भनाई रहेको छ ।