हिंसाविरुद्धको शुन्य सहनशिलता राज्यको जवाफदेहिता : उपसभामुख देव

१२ बैशाख, राजविराज । प्रदेश २ की उपसभामुख उपमा देवले महिलामाथि हुने हिंसाविरुद्धको शुन्य सहनशिलता राज्यको जवाफदेहिता रहेको बताएकी छिन् । महिला मानव अधिकार रक्षक सञ्जाल सप्तरीको आज राजविराजमा सम्पन्न प्रथम पदास्थापन समारोहमा बोल्दै प्रदेश २ की उपसभामुख देवले न्यायपूर्ण शान्तिका लागि सबैखाले विभेद र दण्डहिनता अन्त्य गरी महिलामाथि हुने हिंसा नियन्त्रणको वातावरणका लागि राज्य जवाफदेही बन्दै गएको बताइन् ।

लामो समयसम्म राज्यबाट उपेक्षित समुदायको अधिकारलाई केन्द्रमा राखी सबैको मानव अधिकार सुरक्षित हुनुपर्ने बताउनु हुँदै उहाँले अधिकारको दुरुपयोग गर्न नहुनेतर्फ सचेत समेत गराइन् । निर्वाचन समितिका संयोजक मञ्जु श्रेष्ठको अध्यक्षतामा आयोजित कार्यक्रममा नागरिक समाजका अध्यक्ष थानसिंह भन्साली, जिल्ला बार एकाईका अध्यक्ष डोमन साह, सामुदायिक सेवा केन्द्रका अध्यक्ष हितनारायण लाल दास, इन्सेक प्रतिनिधी मनोहर पोखरेल र सञ्जालकी सल्लाहकार करुणा झाले शुभकामना व्यक्त गरिन् ।

गत फागुन १२ गते सम्पन्न अधिवेशनले अनीता देवकोटाको अध्यक्षतामा १७ सदस्यीय कार्यसमिति र ३ सदस्यीय सल्लाहकार समिति गठन गरेको थियो । जसअनुसार उपाध्यक्षमा सुधा देव, सचिवमा माधवी शाह, सहसचिवमा मनु खनाल र कोषाध्यक्षमा ललीता कर्ण निर्वाचित भएका थिए ।

यसैगरी सदस्यहरुमा मालतीदेबी चौधरी, ज्ञानु भट्टराई, पुनम पोखरेल, सुष्मा गुप्ता, गीता पाण्डे, राजकुमारी साह, साधना कर्ण, बबीता देब, बेबी गुप्ता, कमला खनाल कोइराला, सुनैरदेबी यादव र पार्वती सिंह (प्रिया) रहेकी छिन् । सल्लाहकारहरुमा मञ्जु श्रेष्ठ, मनोहर पोखरेल र करुणा झालाई साधारण सभाले मनोनित गरेको छ । सञ्जालकी सचिव माधवी शाहद्वारा सञ्चालित कार्यक्रममा स्वागत मन्तव्य उपाध्यक्ष सुधा देवले राखेकी थिइन ।