निषेधाज्ञा जारी गरेसँगै हवाई टिकट पाउनै गाह्रो, भाडा बढेर उच्च बिन्दुमा !

१४ बैशाख, काठमाडौं । सङ्क्रमण उच्च देखिएको काठमाडाैं उपत्यकासहित देशका विभिन्न नौ जिल्लामा सरकारले निषेधाज्ञा जारी गरेसँगै आन्तरिक उडानतर्फ धेरै गन्तव्यको लागि टिकट नै पाइन छाडेको छ भने टिकट बाँकी रहेका गन्तव्यको पनि भाडा उच्च बिन्दुमा पुगेको छ ।

धनगढी उडानको लागि भाडा ११ हजार ६ सय ८५  पुगेको छ । केही दिनअघि तीनहजार सम्म टिकट पाइने नेपालगञ्जको हवाई भाडा १० हजार रुपैयाँसम्म र विराटनगरको ७२ सयसम्म पुगेको छ । यस्तै आइतवारसम्म दुई हजार रुपैयाँबाट रहेको पोखराको भाडा बढेर ४८ सय नाघेको छ । यस्तै भैरहवाको ६ हजार बढी पुगेको छ । टिकट पाउन मुस्किल छ ।

सार्वजनिक र निजी सवारी साधानमा रोक लगाइए पनि हवाइ उडानमा भने एक हप्तासम्म हेर्ने र अवस्थाको मूल्याङ्कन गरेर उडान जारी राख्ने या रोक्ने विषयमा निर्णय लिने सरकारले बताएको छ । यसैबीच सार्वजनिक यातायता संचालकहरुले भने हवाइ सेवा सुचारु राखी सार्वजनिक यातायात मात्र रोक लगाउने सरकारको निर्णयको विरोध गर्दै  त्यसको अवज्ञा गर्ने चेतावनी दिएका छन् ।