आज माओवादी बैठक बस्दै

१४ बैशाख, काठमाडौं । सत्ता राजनीतिले गतिलिने अवस्था निर्माण भएपछि नेकपा माओवादी केन्द्रले पनि स्थगित अवस्थामा रहेको स्थायी कमिटीको बैठक आजका लागि बोलाएको छ । केपी ओली सरकारलाई दिइरहेको समर्थन फिर्ता लिन दबाव परिरहेका बेला माओवादीले गएको हप्ता नै बैठक राखी यसबारे आवश्यक निर्णय लिन अध्यक्ष पुष्पकमल दाहाल ‘प्रचण्ड’लाई अधिकार दिने निर्णय गरेको थियो । तर सत्ताको गाँठो फुकाउने हैसियतमा रहेको जनता समाजवादी पार्टीको अनिर्णयका कारण बैठक स्थगित भएको थियो ।

अब भने जसपाले समर्थन गरेपनि नगरेपनि अविश्वास प्रस्ताव अगाडि बढाउन कांग्रेस तयार भएकाले माओवादीले पनि सरकारविरुद्धको समर्थन औपचारिक रुपमै फिर्ता लिन लागको हो । बैठक आज अपरान्ह ३ बजे पार्टी मुख्यालय पेरिसडाँडामा बस्ने जानकारी प्रवक्ता नारायणकाजी श्रेष्ठले दिएका छन् । यद्यपि उनले बैठकको अजेण्डाबारे प्रष्ट गर्न चाहेनन् । उनले भने – आवश्यकता अनुसार सबै विषयमा छलफल र निर्णय हुने छ ।

स्रोत भन्छ– जसपाले सहयोग गर्ने निर्णय ग¥यो भने आजै साँझसम्म सरकारविरुद्ध अविश्वास प्रस्ताव दर्ता हुन सक्छ । जसपाले आफ्नो कार्यकारिणी बैठक डाक्ने तयारी गरिरहेको छ । माओवादीले संगठनात्मक संरचनाका बारेमा पनि आजै निर्णय लिन सक्ने बताइएको छ ।