गण्डकी प्रदेशमा एमालेद्वारा होहल्ला

१४ बैशाख, पोखरा । गण्डकी प्रदेश सरकारविरुद्ध दर्ता भएको अविश्वास प्रस्ताव पारित हुने लगभग निश्चित भएपछि नेकपा एमालेले नयाँ लफडा झिकेको छ । आजको प्रदेशसभा बैठकमा एमाले सांसद्हरुले होहल्ला गरेका छन् ।

सांसद्हरुको होहल्लाले गर्दा सभामुखले बैठक २० मिनेटका लागि स्थगित गरेका छन् । एमाले सांसद्हरुले सबै सांसद्को पीसीआर टेस्ट गरेपछि मात्रै बैठक सञ्चालन गरिनुपर्ने भन्दै होहल्ला गरेका हुन् । हिजोदेखि सुरु भएको प्रदेशको विशेष अधिवेशनले मुख्यमन्त्री पृथ्वीसुब्बा गुरुङमाथि लगाइएको अविश्वास प्रस्तावमाथि छलफल र निर्णय गर्ने कार्यक्रम रहेको छ ।

अहिले नेपाली कांग्रेस संसदीय दलका नेता कृष्णचन्द्र नेपालीलाई नयाँ मुख्यमन्त्रीका रुपमा अगाडि सारिएको छ । नेपाली कांग्रेस, नेकपा माओवादी र जनता समाजवादी दलले सरकारविरुद्ध अविश्वास प्रस्ताव दर्ता गराएका हुन् ।