देउवाले ३ बजे पत्रकार सम्मेलन गर्दै

१७ बैशाख, काठमाडौं । लामो समय सत्ता राजनीतिको केन्द्रीय पात्रको रुपमा अघि सारिएका नेपाली कांग्रेसका सभापति शेरबहादुर देउवा अब भने सार्वजनिक रुपमै आफ्ना कुरा राख्न तयार भएका छन् । यस प्रयोजनका लागि देउवाले आजै अपरान्ह् ३ बजे बूढानिलकण्ठस्थित आफ्नै निवासमा पत्रकार सम्मेलनको आयोजना गर्दैछन् ।

सभापति देउवाका स्वकीय सचिव भानु देउवाका अनुसार, ३ बजेका लागि पत्रकार सम्मेलन डाकिएको छ । सबैलाई खबर भइसकेको र सभापतिले आफ्ना कुरा प्रष्टसँग राख्ने जानकारी उनले दिए । देउवाले पछिल्लो राजनीतिक परिवेश र सरकारले कोरोना महामारी रोक्न कुनै पहल नगरेको विषय मुख्य रहने बताइएको छ ।

आगामी भदौमा पार्टीको चौधौं महाधिवेशन गर्नैपर्ने संवैधानिक वाध्यता र कोरोना कहरको वर्तमान अवस्थाले पारेको प्रभावका सम्बन्धमा पनि देउवाले आफ्ना भनाई सार्वजनिक गर्ने भएका छन् । हिजै मात्र नेकप माओवादी केन्द्रका अध्यक्ष पुष्पकमल दाहाल ‘प्रचण्ड’ले एउटा टेलिभिजन अन्तर्वार्तामा तत्कालै वैकल्पिक सरकार बन्ने छाँटकाँट नभएको प्रष्ट्याए थिए ।