प्रधानमन्त्री ओलीले यही २७ गते संसदबाट विश्वासको मत लिने

१९ बैशाख, काठमाडौं । प्रधानमन्त्री केपी ओली आफूबिरुद्ध आउनसक्ने सम्भावित खतरालाई मध्यनजर राख्दै विश्वासको मत लिने तयारीमा लागेका छन् । आइतबार प्रधानमन्त्री निवास बालुवाटारमा जारी मन्त्रिपरिषद बैठकमा प्रधानमन्त्री ओलीले आफूले विश्वासको मत लिने जानकारी गराएको बताइएको छ ।

बालुवाटार स्रोतका अनुसार प्रधानमन्त्री ओलीले यही बैशाख २७ गते सदनबाट विश्वासको मत लिने तयारी थालेका हुन् । अहिले बालुवाटारमा बैठक चलिरहँदा ओली राष्ट्रपति विद्यादेवी भण्डारीलाई भेट्न शीतलनिवासतिर लागेका छन् ।

आजै दिउँसो पनि ओली राष्ट्रपतिलाई भेट्न शीतलनिवास पुगेका थिए । लुम्बिनी प्रदेशसहित अन्य प्रदेशहरुमा धमाधम अविश्वास प्रस्ताव आउन थालेपछि उनले आफूलाई सुरक्षित हुने बाटो समात्न लागेका हुन् । प्रदेशमा राजनीतिक लफडा चुलिएपछि ओलीका सबैभन्दा विश्वासपात्र लुम्बिनीका मुख्यमन्त्री शंकर पोखरेल आफैले चालेको कदमबाट थप संकटमा परेका छन् ।