उपत्यकामा एक साता लकडाउन थपिने

२० बैशाख, काठमाडौं । राजधानीलगायत देशका सहरी क्षेत्रमा कोरोना संंक्रमणको दर व्यापक रहेको भन्दै उपत्यकाको जनजीवन अझै कसिलो बनाइन लागेको छ । एक साताका लागि उपत्यकामा लगाइएको निषेधाज्ञाले कोरोनाको संक्रमण रोक्न नसकेको भन्दै तीनवटै जिल्लाका प्रमुख जिल्ला अधिकारीहरुले वैशाख मशान्तसम्म थप्ने संकेत गरेका छन् ।

काठमाडौंका प्रमुख जिल्ला अधिकारी कालीप्रसाद पराजुलीले आज ललितपुर र भक्तपुरका समकक्षीहरुसँग कुरा भएको र सम्भवत भोलि औपचारिक रुपमै बैठक गरी निषेधाज्ञा थप्ने तयारी रहेको बताए ।

उपत्यकामा आज पाँचौ दिनको निषेधाज्ञा हो । तर कतिपय स्थानमा मानिसको भीडभाड कायमै देखिएको र भित्री सडकमा स्वास्थ मापदण्डको पालना नभएको भन्दै अब कडाई गरिने पनि उनले बताए ।

कोरोना संक्रमणको ग्राफ अझै उकालो लागिरहेकाले थप एक साता निषेधाज्ञा लम्बिने उनले बताए । गएको विहीबारदेखि एक साताका लागि निषेधाज्ञा जारी छ । मन्त्रिपरिषदले पनि निषेधाज्ञा आवश्यकता अनुसार स्थानीय प्रशासनले दुई सातासम्म लम्ब्याउन सक्ने अधिकार प्रत्यायोजन गरिसकेको छ । सोही बमोजिम वैशाख मशान्तसम्म निषेधाज्ञा लम्बिने सम्भावना रहेको उनले बताए ।