घट्याे देशभरकाे वायु प्रदूषण

 २३ बैशाख, काठमाडाैं ।  काठमाडौं उपत्यकासहित देशभरको वायु प्रदूषण घटेको छ । सरकारले कोरोना भाइरस महामारी नियन्त्रण गर्न जारी गरेको निषेधाज्ञा देशका विभिन्न जिल्लामा लागु भएपछि देशैभरको वायुप्रदुषणमा सुधार आएको हो ।

वातावरण विभागका अनुसार उद्योग, कलकारखाना बन्द भएको र अत्यावश्यकबाहेकका सवारी साधन गुड्न पनि प्रतिबन्ध लगाएकाले वायुको गुणस्तर सुधार भएको हो । मानिसहरु घरबाहिर निस्कन छाडेपछि मानवीय कारणले हुने वायु प्रदूषण पनि घटेको छ ।

वर्षायाम नलाग्दासम्म प्रदूषण मापन गर्दा सधैं ‘रेड जोन’मा रहने काठमाडौं निषेधाज्ञापछि ‘ग्रिन जोन’मा पर्न थालेको छ । यसले काठमाडौंको हावाको गुणस्तर धेरै राम्रो भएको देखिएको छ । सरकारले राखेको प्रदूषण मापन केन्द्रका तथ्याङ्कअनुसार नेपालका सबैजसो क्षेत्रमा वायु प्रदूषण कम भएर ‘ग्रिन’ र ‘एल्लो’ जोन कायम भएका छन् ।

काठमाडौंमा शंखपार्क क्षेत्रमा वायुको गुणस्तरले प्रदूषणको तह पार गरेको छ । अन्य क्षेत्रमा भने वायुको गुणस्तर सुधारोन्मुख देखिन्छ । काठमाडौं उपत्यकाभन्दा बाहिर वायु प्रदूषण कम छ ।

उपत्यकाबाहिर पनि हावाको गुणस्तर राम्रो छ । धनगढीमा पीएम २.५ को मात्रा २३.२ माइक्रोग्राम प्रतिघनमिटर छ । सिमारामा २२.२, दाङमा १६.९, धनकुटामा १५.९ र सौराहामा १५.७ माइक्रोग्रामप्रति घनमिटर छ । त्यसैगरी हेटौंडामा १०.४, विराटनगरमा ८.५, रारामा १३.८ माइक्रोग्राम प्रतिघनमिटर छ ।