नेपाली कांग्रेस आन्तरिक रणनीतिमा

२५ वैशाख, काठमाडौं । एमाले विभाजन रोक्न प्रयास भइरहेका बेला नेपाली कांग्रेस आन्तरिक रणनीतिमा जुटेकाे छ । कांग्रेसले आज संसदीय दलको बैठक बोलाएको छ । विपक्षी अन्य पार्टी र एमालेको माधव  नेपाल पक्षलाई समेत समेटेर प्रधानमन्त्री केपी ओलीलाई सत्ताच्यूत गर्ने प्रयासमा कांग्रेस छ । यसकै लागि दलको बैठक बोलाइएको हो ।

सङ्घीय संसद भवन, बानेश्वरस्थित ल्होत्से हलमा दिउँसो २ बजे बस्ने बैठकमा प्रतिनिधिसभाको आगामी बैठकका सन्दर्भमा पार्टीको रणनीति तय गर्ने, पार्टीको निर्णयअनुसार छलफल तथा सांसदलाई निर्देशन गर्नेलगायत विषयको कार्यसूची रहेको छ । प्रतिनिधिसभाको वैशाख २७ गतेको बैठकमा प्रधानमन्त्री केपी ओलीले विश्वासको मत लिने तयारी गरेका छन् ।

यता प्रधानमन्त्री ओलीले आज साँझ मन्त्रिपरिषद्‌को बैठक बोलाएका छन् । सामान्यतया सोमबार र बिहीबार नियमित बैठक बस्ने गर्छ ।शनिबार बोलाइएको बैठक एकप्रकारले आकस्मिक जस्तै रहेको एक मन्त्रीले बताए ।

ओलीले आइतबार संवैधानिक परिषद्को‌ बैठक पनि डाकेका छन् । बैठकमा विपक्षी दलका नेता शेरबहादुर देउवा र सभामुख अग्नि सापकोटा भने नजाने बताइएको छ । तर संवैधानिक परिषद सम्बन्धी अध्यादेश जारी भइसकेकाले बहुमत सदस्य उपस्थित भएर निर्णय गर्न सक्नेछन् ।