एमालेमा नेपाल पक्षले पार्टी ह्‍वीप नमान्ने, मतदान बहिस्कार गर्ने निर्णय

२७ बैशाख, काठमाडौं । नेकपा एमालेको माधव नेपाल पक्षले पार्टी ह्‍वीप नमान्ने र प्रधानमन्त्री केपी शर्मा ओलीलाई विश्वासको मत पनि नदिई मतदान बहिस्कार गर्ने निर्णय  गरेको छ । सिंहदरवारमा भर्खरै सम्पन्न नेपाल पक्षको बैठकले पार्टी ह्‍वीप नमान्ने, मतदान बहिस्कार गर्ने निर्णय गरेको हो ।

यसअघि राजीनामा दिने बताउँदै आएको नेपाल पक्षले अन्तिम समयमा आएर मतदान प्रक्रियामा सहभागी नहुने र बैठक नै बहिस्कार गर्ने निर्णय गरेको हो । बैठकले सांसद पदबाट राजीनामा नदिने बरु संसदको बैठकमा सहभागी नहुने निर्णय गरेको एमाले नेता भीम रावलले जानकारी दिए । नेपाल पक्षको यो निर्णयसँगै ओलीले विश्वासको मत नपाउने निश्चित भएको छ ।

नेपाल पक्षले बैठकमा सहभागी नहुने र पार्टी ह्वीप उल्लङ्घन गर्ने निर्णय गरेसँगै पार्टी प्रमुख सचेतक विशाल भट्टराईले प्रतिनिधिसभामा ह्वीप उल्लङ्‍घन क्षम्य नहुने र  कारवाही गरिने बताएका छन् । नेपालबहससँग कुरा गर्दै भट्टराईले ह्वीप उल्लङ्‍घन गर्नेलाई पार्टी केन्द्रीय कमिटीले कारबाही गर्ने र यो गंभीर अपराध भएको बताए । ‘संसदीय व्यवस्थामा ह्वीप उल्लङ्‍घन गम्भीर अपराध हो । ह्वीप उल्लङ्‍घन क्षम्य हुँदैन । त्यसमा पार्टीले आफ्नो विधि, विधान र कानुन अनुसार कारबाहीको आवश्यक निर्णय लिन्छ ।’  भट्टराईले भने ।

आज बिहानमात्र प्रधानमन्त्री एवम पार्टी अध्यक्ष केपी शर्मा ओलीले खनाल- नेपाल समूहलाई हतारोमा कुनै पनि अनुचित निर्णय नलिन ध्यानाकर्षण गराएका थिए । एमालेका सांसदहरूलाई सम्बोधन गर्दै उनले सोमबार बिहान सामाजिक सञ्जालमार्फत छलफलको लागि आह्वान गरेका छन् ।

“यस्तो अवस्थामा आन्तरिक मतभेद वा असन्तुष्टि केही भए आपसी छलफलबाट समाधान गर्न सकिने नै छ। तसर्थ, हतारोमा कुनै पनि अनुचित निर्णयमा जान वाञ्छनीय नहुने कुरामा म सबै माननीयज्यूहरूको ध्यानाकर्षण गराउन चाहन्छु। आउनुस्, केही समस्या भए सँगै बसौं, छलफल गरौं र समाधान गरौं । ओलीले ट्वीटरमा उल्लेख गरेका छन् ।

परिवर्तित घटनाक्रम बीच संसद बैठक केही समय पर सर्न सक्ने आंकलन गरिएको छ । बैठक १ बजेका लागि बोलाइएको छ ।