जसपा भित्र चर्कियो रडाको

२८ बैशाख, काठमाडौं । नयाँ सरकार बनाउने विपक्षी दलहरुको प्रयास तीब्र भएपछि जनता समाजवादी दलमा फेरि रमिता सुरु भएको छ ।
विश्वासको मत नपाएर हिजै पदमुक्त भएका प्रधानमन्त्री केपी ओलीको विकल्पमा नयाँ सरकार बनाउन विपक्षी दलहरु सक्रिय हुँदा जसपामा महन्थ र उपेन्द्र पक्षबीच जुहारी सुरु भएको छ ।

ओलीलाई विश्वासको मत दिने वा नदिने भन्ने सन्दर्भमा नै विभाजित पार्टी नेताहरु नयाँ सरकार बनाउने सन्दर्भमा समेत अलग धारमा देखिएका छन् । हिजोकै मतदानमा पनि महन्थ पक्ष तटस्थ रह्यो भने उपेन्द्र पक्षले विश्वासको विपक्षमा मतदान गरेको थियो ।

त्यसपछि उपेन्द्र पक्षले हिजै कांग्रेस संसदीय दलका नेता शेरबहादुर देउवा नेतृत्वमा गठबन्धन सरकार बनाउन हस्ताक्षर बुझाएको छ । यो घटनालाई लिएर जसपा भित्र रडाको मच्चिएको छ । नेता राजेन्द्र महतोले उपेन्द्र यादव एक्लैले चाहेर सरकारमा सहभागी बन्न नसक्ने तर्क गरेका छन् ।

महन्थ ठाकुर पहिलो अध्यक्ष भएकाले उनको हस्ताक्षर बिना राष्ट्रपतिले जसपाको आधिकारिक नभएको बुझ्नुपर्ने तर्क गरेका छन् । राष्ट्रपति समक्ष जसपाको नाममा जाने पत्रमा ठाकुरको हस्ताक्षर अनिवार्य हुने उनको बुझाई छ । सत्ता स्वार्थका लागि उपेन्द्र फेरि देउवासँग टाँस्सिएको भन्दै उनले मधेसको मुद्धा भन्दा पदका लागि गठबन्धन बनाउन लागेको ओरोप लगाएको छन् ।

तर उपेन्द्र पक्षका सांसद मोहमद इस्तेयाक राइले पार्टीले सके सर्वसम्मत नभए वहुमतबाटै गठबन्धन बनाउने निर्णय गर्ने बताए । मधेसको मुद्धाबारे आफूहरु बढी संवेदनशील रहेको भन्दै उनले ओली सरकारले रिहा गरेका १२० जनाको मुद्धा पूर्वाग्रही रहेको र सरकारले नै फिर्ता लिएको प्रष्ट पारे ।

महन्थ ठाकुर पक्षको तर्क गलत भएको उनको भनाई छ । ओली सरकारले मधेसका लागि भन्दा व्यक्तिको स्वार्थ पूरा गर्न मात्रै यस्तो मुद्धा उठाएको उनको आरोप छ । साँच्चै मधेशका लागि केही गर्ने भए रेशम चौधरीको रिहाई , लाल आयोगको सार्वजनिकीकरण र नागरिकता विधेयक अनि संविधान संशोधनका विषयमा किन केही भएन ? उनले प्रश्न गरे ।

मधेसका मामलामा हामी नै बढी संवेदनशील छौं भन्दै पूर्व मन्त्रीसमेत रहेका राइले व्यक्तिगत स्वार्थ पूर्ति गर्ने भाँडोका रुपमा ओलीसँगको सम्बन्ध प्रगाढ बनाउन खोजेको बताए ।