देउवा–प्रचण्ड वार्ता जारी

२८ बैशाख, काठमाडौं । केपी ओली नेतृत्वको सरकार सधैंका लागि विस्थापन गर्न कम्मर कसेर लागेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नयाँ रणनीति तय गर्न अहिले बूढानिलकण्ठ पुगेका छन् ।

नेपाली कांग्रेसका सभापति शेरबहादुर देउवासँग नयाँ सरकार गठन गर्ने सहज बाटो पहिल्याउने रणनीति तयार गर्न उनी त्यहाँ पुगेका हुन् । देउवा र प्रचण्डबीच अहिले छलफल जारी छ ।

जनता समाजवादी पार्टीको महन्थ ठाकुर पक्षको अर्घेल्याईंका कारण गठबन्धन बनाउन समस्या भइरहेका बेला सम्भावित विकल्पमा छलफल गर्ने हेतुले प्रचण्ड देउवालाई भेट्न पुगेका हुन् ।

राष्ट्रपतिले वैशाख ३० गतेसम्मका लागि संविधानको धारा ७६ को उपधारा २ बमोजिमको सरकार गठन गर्न समयसीमा तोकेकी छन् ।
जसपाको उपेन्द्र पक्ष नयाँ सरकार बनाउन खुलेर सकृय छ भने महन्थ पक्ष भने यथास्थितिमै रहने अडानमा छ ।

ओलीलाई धारा ७६ को उपधारा ३ बमोजिम सरकार बनाउने वातावरण तयार र्ग महन्थ पक्ष अडिग देखिएको छ । यस्तो अवस्थामा एमाले कै माधव नेपाल पक्षलाई कसरी विश्वासमा लिने भन्नेबारे देउवा प्रचण्डबीच छलफल हुने अनुमान गरिएको छ ।