गण्डकीको सत्ता समीकरण नयाँ मोडमा

२९ बैशाख, काठमाडौं । गण्डकी प्रदेशमा नयाँ सरकार बनाउने सपनामै सीमित हुने छाँटकाँट देखिएको छ । गण्डकी प्रदेशमा राष्ट्रिय जनमोर्चाका दुई प्रदेशसभा सदस्यले आफूहरु कुनै गठबन्धनमा सहभागी नरहेको भनी सार्वजनिक वक्तव्य दिएपछि सत्ता समीकरण नयाँ मोडमा पुगेको हो ।

नेपाली कांग्रेसका सांसद कृष्णचन्द्र नेपाली पोखरेलले मुख्यमन्त्रीमा दावी पेश गरेको केहीबेरमै राष्ट्रिय जनमोर्चाका ३ मध्ये २ सांसदले आफूहरु कुनै गठबन्धनमा नरहेको भनी विज्ञप्ति निकालेका छन् । सांसदहरु कृष्ण थापा र खिमबिक्रम शाहीले आफूहरु कुनै पनि गठबन्धनमा नरहेको र सरकार निर्माणका विषयमा तटस्थ रहेको उल्लेख गरेका छन् ।

केही समयअघिसम्म राष्ट्रिय जनमोर्चाका एक सांसद कृष्ण थापा सरकारमा जान अस्विकार गर्दै आएका थिए र उनलाई पार्टीबाट समेत कारबाही गरिएको थियो । तर, अहिले राजमोका खिमबिक्रम शाहीले आफूहरु कुनै पनि गठबन्धनमा नरहेको र सरकार निर्माणका विषयमा तटस्थ रहेको उल्लेख गरेका छन् । उनी यसअघि मुख्यमन्त्री पृथ्वीसुब्बा गुरुङविरुद्धको अविस्वास प्रस्तावको मतदानमा गायब भएका थिए ।

पछि पार्टीले भनेपछि नयाँ सरकार गठनमा इच्छा देखाए पनि अहिले आएर आफू तटस्थ बन्ने बताएका छन् । थापा र शाही दुबैले आफूहरु कुनै गठबन्धनमा सहभागी नरहेको भनेर सार्वजनिक वक्तव्य निकालेका छन् ।

दुई सांसदले अन्तिम समयमा आएर धोका दिए पछि नेपाली कांग्रेसका सांसद कृष्णचन्द्र नेपाली पोखरेलले बुधबार दावी गरेको मुख्यमन्त्री पद खेर जाने निश्चित छ । बुधबार पोखरेलले दावी पेश गरेको केहीबेरमै राष्ट्रिय जनमोर्चाका ३ मध्ये २ सांसदले आफूहरु कुनै गठबन्धनमा नरहेको भनी विज्ञप्ति निकालेका छन् ।

पोखरेललको नेतृत्वमा नयाँ सरकार बन्न ३१ मत आवश्यक पर्दछ । दुई सांसदले साथ नदिएपछि अब २९ मतमात्र रहेको छ । हाल ६० सदस्यीय रहेको प्रदेश सभामा नेपाली कांग्रेसका १५, नेकपा माओवादी केन्द्रका १२ ‘सभामुखसहित’, राष्ट्रिय जनमोर्चाका ३ र जनता समाजवादी पार्टीका २ सांसद रहेका छन् ।