राजीनामा रोक्न ओलीको सन्देश लिएर पौडेल नेपाल निवासमा

३० बैशाख, काठमाडौं । नेकपा एमाले खनाल- नेपाल पक्षका सांसदहरुले राजीनामा दिने तयारी गरिरहँदा त्यसलाई रोक्न प्रधानमन्त्री केपी ओलीको सन्देश लिएर विष्णु पौडेलले बरिष्ठ नेता माधव कुमार नेपालकाे निवासमा पुगेका छन् ।

नेकपा एमालेका अध्यक्ष केपी ओलीले स्थायी कमिटीको बैठक बोलाएपछि बैठक बस्नुअघि पाैडलले नेपालसँग भेटवार्ता गरेका हुन् । असन्तुष्ट नेपाल पक्षका सांसदले राजीनामा दिने तयारी गरिरहेका बेला ओलीले त्यसलाई रोक्न अन्तिम कसरत गरिरहेका छन्।

पाैडेलले कोटेश्वर नेपाल निवासमा पुगेर ओलीले राखेको नयाँ प्रस्तावका विषयमा नेपाललाई जानकारी गराउँदै राजीनामा नदिन आग्रह गरेका छन्  । नेपाल पक्षको आजै  स्थायी समिति राजीनामा दिने निर्णयमा पुग्नै लागेको बेला पौडेल नेपाललाई भेट्न बिहानै उनकाे निवासमा पुगेका हुन् ।

यता, नेकपा एमालेका अध्यक्ष केपी ओलीले स्थायी कमिटीको बैठक बोलाएका छन्। अहिले बिहान साढे ९ बजे प्रधानमन्त्रीको सरकारी निवास बालुवाटारमा पार्टीको स्थायी कमिटी बैठक बस्न लागेको छ ।

पछिल्लो राजनीतिक घटनाक्रमका बारेमा छलफल गर्न बैठक बस्न लागेको बालुवाटार स्रोतले बताएको छ । आजको बैठकले माधवकुमार नेपाल पक्षका माग सम्बोधन गर्ने सबै अधिकार ओलीलाई दिने निर्णय गर्न सक्ने बुझिएको छ।