ओली जेठ २ मा फर्कन्छ भने नेपालले इमान्दार सहमति गर्ने

३० बैशाख, काठमाडौं । राष्ट्रपति विद्यादेवी भण्डारीले नयाँ सरकार गठनका लागि बहुमत जुटाउन दलहरुलाई दिएको भाका सकिन केही घण्टा मात्रै बाँकी रहेका बेला प्रधानमन्त्री एवं नेकपा एमाले अध्यक्ष केपी ओलीले आफूसँग असन्तुष्ट माधवकुमार नेपाल पक्षलाई फकाउने तीव्र प्रयास थालेका छन् ।

अबकाे केही समयपछि प्रधानमन्त्री ओली र नेता नेपालबीच वार्ता हुँदैछ । तर प्रधानमन्त्री ओली २०७५ जेठ २ को अवस्थामा फर्कन तयार नभएसम्म सामुहिक राजीनामाको अडानबाट पछि नहट्ने नेता माधवकुमार नेपालले आफू निकट नेताहरुलाई स्पष्ट पारेका छन् ।

नेपाल समुहकाे माग सबै कमिटीहरु २ जेठ २०७५ को अवस्थामा फर्कनुपर्छ भन्ने हो । यसमा ओली तयार हुन्छन् भने नेपाल समुहले इमान्दार सहमति कायम गर्ने भएकाे छ ।

अबको एकाध घण्टामा ओली र नेपालबीच वार्ता हुन्छ, कुरा मिल्यो भने ठीकै छ, नभए हाम्रोतर्फबाट सामुहिक राजीनामा आउँछ,’ माधव नेपाल निकट स्रोतले बताएकाे छ ।

यसैबीच, आजै बालुवाटारमा प्रधानमन्त्री ओलीले आफ्नो पक्षको स्थायी कमिटी बैठक राखेका थिए । सो बैठकले माधव नेपालसहित चार जनाको कारवाही फिर्ता लिने निर्णय गरेको छ ।

साथै  माधव पक्षसँग सहमति गर्ने सम्पूर्ण अधिकार बैठकले अध्यक्ष ओलीलाई दिएको छ । उता माधवकुमार नेपालले पनि केपी ओलीसँग वार्तामा बस्नुअघि कानुनविदहरुसँग परामर्श गरेका छन् ।