कोरोना महामारीमा सरकार लाचार र गैर जिम्मेवार भयो : पूर्व स्वास्थ्य मन्त्री बोहोरा

३० वैशाख, काठमाडौं । पूर्व स्वास्थ्य मन्त्री तथा राप्रपाका बरिष्ठ नेता दिपक बोहराले कोरोना महामारीमा सरकार लाचार र गैरजिम्मेवार भएको बताएका छन् । उनले कोरोना संक्रमित बिरामीको समयमा अक्सिजन नपाएर नै ज्यान गएको घटना प्रति आफ्नो गम्भिर ध्यानाकर्षण भएको जनाएका छन् ।

उनले आज एक विज्ञप्ति जारी गर्दै रूपन्देहीको बुटवलमा ५ जना र सिद्वार्थनगरमा ४ जनाको कोरोनाबाट ज्यान गएको घटनाले आफु मर्माहित भएको बताएका छन् । सरकारको यो गम्भिर लापरवाहीको परिणाम हो । कोरोनाको दोश्रो लहरको भयावह स्थितीमा अक्सिजनको प्रयाप्त व्यवस्था गर्न नसक्नु र अस्पतालहरूले अक्सिजनको कारणले नया‘ बिरामी लिन नसक्ने जस्तो सुचना प्रकाशित गर्दा समेत त्यसको व्यवस्थापन गर्न नसक्नु भनेको सरकारको लाचारीपना र गैरजिम्मेवार कार्य भएको बोहोराले बताएका छन् । साथै वर्तमान सरकारको यस्तो कार्यको घोर भत्सर्ना गरेका छन् ।

विज्ञप्तिमा भनिएको छ, अहिलेको मुख्य कार्य भनेको जनताको जिवनको सुरक्षा हो । तसर्थ प्रदेश सरकार र स्थानिय सरकारले आफ्नो सम्पुर्ण श्रोत र साधनको प्रयोग कोरोना महामारीको नियन्त्रण र नागरिकको जिवन रक्षामा लगाउन आग्रह गर्दछु । जनताको जिवन रक्षा गर्नु सरकारको दायित्व हो । समयमा अक्सिजन उपलव्ध हुन नसकेको घटनाको छानविन गरी दोषि माथी कारवाही गर्न समेत स्थानिय प्रशासनलाई आग्रह गर्दछु । अक्सिजन र उपचार नपाई नागरिकले ज्यान गुमाउनु पर्ने अवस्थाको अन्त्य गर्न समेत सरकार संग अनुरोध गर्दछु ।

त्यस्तै नागरिकको जिवन रक्षा र सरलिकरणको लागी खोपको तत्काल व्यवस्था गर्नु आवश्यक भएको उल्लेख गरिएको छ । खोप नलगाएकालाई लगाउने व्यवस्था गर्न र पहिलो कोभिसिल्डका खोप लगाएकाहरूको दोश्रो खोप लगाउने समय पुरा हुन लागेको अवस्थामा छिमेकी मुलुक भारतबाट जुनसुकै माध्यमबाट ल्याएर भएपनि दोश्रो खोपको व्यवस्थाको लागी समेत सरकार संग बोहोराले आग्रह गरेका छन् ।

उनले विज्ञप्तिमार्फत भेरोसेलको दोश्रो खोपको व्यवस्था गरेकोमा सरकारलाई धन्यवाद ज्ञापन पनि गरेका छन् । अहिले कोरोनाको कारण स्थिति भयावह बन्दै गईरहेको छ । यो अवस्था सचेत रहन र सुरक्षित रहन सबैमा अपिल गर्दछु । बोहोराले स्वास्थ्य सुरक्षा अपनाई यो महामारीमा नागरिकको जिवन रक्षामा आवश्यक सहयोग गर्न राप्रपाका सम्पुर्ण सदस्यहरूलाई अनुरोध गरेका छन् । आफु पनि बचौ, अरूलाई पनि बचाऔ । यो महामारीमा ज्यान गुमाउने सम्पुर्णमा हार्दिक श्रद्धांजली । शोक सन्तप्त परिवारजनमा हार्दिक समबेदना । साथै कोरोना संक्रमित सम्पुर्णको स्वास्थ्य लाभको कामना विज्ञप्तिमार्फत गरिएको छ ।