ओलीलाई जसरी भएपनि सत्ताच्यूत गर्ने नेपाल पक्षको दाउ

३० बैशाख, काठमाडौं । सत्तायात्रामा पूर्णविराम लाग्ने अवस्था आएपछि मात्रै खनाल–नेपाल पक्षको मागबारे सुनुवाई गर्न तयार भएका प्रधानमन्त्री केपी ओली आज फेरि सफल होलान् त? धेरैलाई लागेको छ –ओली फेरि पनि आफ्नो छलछाममा सफल हुनेछन् ।

तर एमालेकै असन्तुष्ट पक्ष भने ओलीलाई सही ट्रयाकमा ल्याउने यो भन्दा ठूलो अवसर तत्कालै आउनेवाला छैन । त्यसैले ओलीको सत्तायात्रा कमसेकम अहिलेलाई यहीं टुंगिने छ ।

गएको सोमबार संसद्मा विश्वासको मत आर्जन गर्न विफल भएका ओली आजै राति अल्पमतको प्रधानमन्त्री बन्ने दाउमा छन् । राष्ट्रपति विद्यादेवी भण्डारीले आज साँझ ९ बजेसम्मका लागि संविधानको धारा ७६ (२) को संयुक्त सरकार गठन गर्न समयसीमा दिएकी छन् ।

प्रमुख प्रतिपक्षी दल नेपाली कांग्रेसका सभापति शेरबहादुर देउवा नेतृत्वमा गठबन्धन सरकार बनाउने प्रयास जारी छ । यसका लागि जनता समाजवादी पार्टीको असन्तुष्ट पक्ष निर्णायक बनेको छ । अहिले देउवासँग महन्थ ठाकुर र राजेन्द्र महतोले भेट गरेका थिए । भेटमा महन्थको नेतृत्वमा सरकार बनाउन सहमत भए मात्र आफ्नो समर्थन रहने प्रस्ताव आएको स्रोतको दाबी छ ।

उक्त प्रस्ताव उपर कांग्रेसले थप छलफल गर्ने भएको छ । यसका लागि सभापति देउवाले अहिले ४ बजे आफ्नै निवासमा पदाधिकारी बैठक डाकेका छन् । उक्त बैठकले गर्ने निर्णयका आधारमा मात्रै नयाँ सरकारको प्रष्ट चित्र आउने देखिन्छ । कदाचित महन्थको प्रस्ताव मान्न कांग्रेस तयार भएन भने पनि ओलीको विकल्प दिन माधव नेपालहरु लामबद्ध हुने अवस्था छ ।

सत्ता टिकाउन मात्रै ओलीले अहिले चाल चलेको भन्ने नेपाल पक्षले राम्ररी बुझेको छ । यद्यपि ओलीसँग अहिले निर्णायक वार्ता गर्न नेता नेपाल तयार भएका छन् । जेठ २, २०७५ लाई माधव पक्षले बटमलाइन बनाएको छ । त्यसमा ओली साँच्चै सहमत हुने अवस्था छैन ।

कार्यदल बनाएर जाने भन्ने खालका प्रस्ताव आएपनि नेता नेपालले नमान्ने बुझिएको छ । तर ओलीको विकल्पमा जसपासँग विपक्षीहरुको कुरा मिल्यो भने चाहिं नेपालले राजीनामा नगर्ने मनस्थिति बनाएका छन् ।

यसरी हेर्दा ओलीलाई कुनैपनि हालतमा सत्ताच्यूत गर्ने पक्षमा नेपाल पक्ष अटल रहेको प्रष्ट हुन्छ । त्यसैले ओलीलाई जसरी पनि हटाएरै छाड्ने नेपाल पक्षले रणनीति बनाएकाले उनको बालुवाटार बसाई लगभग समाप्त भएको देखिन्छ । ओलीलाई सत्ताबाट गिराएपछि मात्रै पार्टी भित्र शक्ति सन्तुलन कायम हुने नेपाल पक्षको बुझाई छ ।