नुवाकोटका हरेक स्थानीय तहमा अक्सिजन सहितको आइसोलेसन केन्द्र

३१ बैशाख, काठमाडौं । कोरोना भाइरसबाट सङ्क्रमित बिरामीको उपचार गर्न नुवाकोटका सबै स्थानीय तहले अक्सिजन सहितको आइसोलेसन केन्द्र स्थापना गरेका छन् । स्वास्थ्य कार्यालय नुवाकोटका अनुसार नुवाकोटका १२ स्थानीय तहसहित नेपाली सेनाको नं. १ तालीम गण र त्रिशूली अस्पतालमा गरी जिल्लाभर कुल २ सय २२ शैय्याको आइसोलेसन  सञ्चालनमा ल्याइएको छ ।

जन स्वास्थ्य कार्यालय नुवाकोटका अनुसार पहाडि नुवाकोटका अधिकांश स्थानीय तहले पहिलो चरणको कोरोना महामारीको समयमा तयार गरेका आइसोलेसनलाई पुनःसञ्चालनमा ल्याएका छन् । केहीले यसअघि बनाएको क्वारेन्टिन (सुरक्षित बासस्थान ) लाई स्तरोन्नति गरेर हाल आइसोलेसन शैय्यामा रुपान्तरण गरेका छन् ।

विदुर नगरपालिकाले बट्टार नागटारीस्थित कर्भडहलमा २२ र नुवाकोट सिटी कम्युनिटी अस्पतालमा १५ गरेर ३७ शैय्याको आइसोलेसन तयार गरेको विदुर नपाका स्वास्थ्य शाखा प्रमुख पूर्णध्वज श्रेष्ठले जानकारी दिए । आइसालेसनमा अक्सिजन सिलिण्डर, अक्सिजन कन्सनट्रेटर, पल्स–अक्सोमिटर सहित चिकित्सकको व्यवस्था गरिएको छ ।

बेलकोटगढी नगरपालिकामा कोभिड अस्पतालसहित २५ शय्याको आवश्यक सुविधासहित आइसोलेसन केन्द्र सञ्चालनमा ल्याइएको मेयर राजेन्दरमण खनालले जानकारी दिए ।  लिखुमा १०, शिवपुरीमा २०, म्यागङमा ८, किस्पाङमा ५, सूर्यगढीमा २०, तादीमा २०, तारकेश्वरमा ९, दुप्चेश्वरमा ८, पञ्चकन्यामा ५ र ककनी गाउँपालिका ५ शय्याको आइसोलेसन कक्ष तयार रहेको छ ।

आइसोलेसन कक्षमा सबै स्थानमा अक्सिजनसहित अक्सिजन कन्सनट्रेटर, पल्स–अक्सोमिटर, पिपिइ, भाइरस परीक्षण गर्ने एण्टिजेन कीट, आरटिपिसिआरको लागि स्वाब सङ्कलन गर्न भिटिएमसहितको सुविधा रहेको छ ।