एमाले विवाद मिलाउन ५–५ जनाको वार्ता टोली गठन

२ जेठ, काठमाडौं ।  नेकपा एमालेको विवाद मिलाउन ५–५ जनाको वार्ता टोली गठन गरिएकाे छ । पार्टी अध्यक्ष केपी ओली र वरिष्ठ नेता माधवकुमार नेपालबीच आज सिंहदरबारमा भएको वार्तापछि दुवैतर्फका ५–५ जना रहने गरी १० सदस्यीय कार्यदल गठन भएको हो।

नेता नेपालले आफूले सार्वजनिक गरेको ६ बुँदे प्रस्तावमा रहेर छलफल हुने बताएका छन्।  वार्ता टोलीमा ओली पक्षबाट सुवास नेम्वाङको नेतृत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल रहेका छन् भने नेपाल समूहबाट भीम रावलको नेतृत्वमा घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त रहेका छन् ।

आइतबार सिंहदरबारमा बसेको एमाले अध्यक्ष र वरिष्ठ नेता माधव कुमार नेपालबीचको वान टु वान वार्ताले दुबै तर्फबाट ५–५ जना रहने गरी वार्ता टोली बनाउने सहमति जुटेको हो ।

आज सिंहदरबारस्थित प्रधानमन्त्री कार्यालयमा भएको वार्तापछि बाहिरिदै गर्दा  छोटो प्रतिक्रिया दिँदै ओलीले पार्टीभित्रको विवाद समाधान उन्मुख भएको बताएका हुन्।