बजेट अगावै संसद भंग गर्ने दाउ

४ जेठ, काठमाडाैं ।  सरकारले नयाँ आर्थिक वर्षको अनुमानित खर्च व्ययको विवरण बजेट पेश गर्ने दिन आइसक्यो । संविधानमै जेठ १५ गते बजेट पेश गर्नुपर्ने वाध्यात्मक व्यवस्था गरेको छ । तर बजेट कसरी प्रस्तुत गर्ने भन्ने अन्योलमा सरकार रहेको छ ।

भर्खरै मात्र अल्पमतको सरकारमा रुपान्तरण भएको केपी ओली नेतृत्वको सरकारले यथास्थितिमा संसद्मा बजेट प्रस्तुत गर्ने आँट गर्न सकिरहेको छैन । किनभने वहुमत निश्चित भइसकेको छैन । संसद्बाट अस्वीकृत हुने गरी ओली बजेट ल्याउने पक्षमा छैनन् । त्यसैले उनको ध्यान पहिला विश्वासको मत आर्जन गर्नेमा केन्द्रित रहेको छ ।

हिजो साँझ बसेको मन्त्रिपरिषद बैठकमा ओलीले छिट्टै विश्वासको मत लिने बताएका थिए । संविधानतः सरकार गठन भएको ३० दिन भित्र संसद्बाट विश्वासको मत लिनुपर्ने हुन्छ । विश्वासको मत लिन उनी वजेट भन्दा अगावै चाहन्छन् । त्यसैले मात्र उनको वजेट पास हुने सुनिश्चित गर्छ । तर उनलाई समस्या भनेको जनता समाजवादी पार्टीबाटै छ । किनभने उसले ओलीलाई अझै समर्थन गरिसकेको छैन ।

विश्वासको मत लिने बेला जसपाको ठाकुर–महतो समूह तटस्थ मात्रै बसेको हो । स्रोतका अनुसार, ओलीले जेठ ६ गते नै विश्वासको मत लिन चाहेका थिए । तर महन्थ ठाकुर समूहले समर्थन नगर्ने चेतावनी दिएकाले ओली हच्केका हुन् । ओलीले जसपाको ठाकुर समूहलाई सरकारमा आउन आमन्त्रण गरेका छन् । तर मधेसका माग पूरा नभएको भन्दै जान आनाकानी गरिरहेको छ । अब भने ओली विश्वासको मत पाएपनि नपाएपनि बजेट अगावै परीषण गर्ने निश्चयमा पुगेको स्रोतको भनाई छ । विश्वासको मत नपाए तत्कालै प्रतिनिधिसभा विघटन गर्ने पक्षमा रहेका छन् ।

ओली पक्षीय कानून व्यावसायीहरुको तर्कमा संविधानको धारा ७६(५) मा जानै पर्दैन । किनभने ओलीविरुद्ध कुनै व्यक्तिले वहुमत सिद्ध गर्ने आधार छैन । त्यसैले अब सोझै संविधानको धारा ७६ (७) आकर्षित हुने उनीहरुको तर्क रहेको छ । सोही बमोजिम उनी संसद विघटन गरी अर्ली इलेक्सनमा जान चाहन्छन् । ठाकुर पक्षले विश्वासको मत नदिए वाध्य भएर प्रतिनिधिसभा विघटन गर्नुपर्ने ओलीले निकटवर्तीहरुलाई बताउँदै आएका छन् ।