जसपाभित्र एकताको वातावरण

४ जेठ,  काठमाडौं । विभाजनको संघारमै पुगिसकेको जनता समाजवादी पार्टी नाटकीय ढंगले जोगिने दिशातर्फ उन्मुख भएको छ । पार्टी अध्यक्षद्वय महन्थ ठाकुर र उपेन्द्र यादवबीच आज बिहान भएको वार्तामा यस्तो समझदारी जुटेको हो ।

जसपाका नेता राजकिशोर यादवका अनुसार, आजै अध्यक्षद्वयको संयुक्त हस्ताक्षरसहितको विज्ञप्ति जारी गरिने छ । पार्टी भित्रका मत मतान्तर पछि मिलाउँदै जाने गरी हाललाई सिजफायर भएको हो–उनले भने ।

खासगरी केपी ओली नेतृत्वको वर्तमान सरकारलाई हेर्ने फरक दृष्टिकोणले पार्टी भित्र मतान्तर बढेको थियो । आज नेताहरुले सबै पार्टी आपसमा मिलेका छन् भने मधेसीहरुको आस्थाको प्रतीकका रुपमा रहेको जसपा पनि किन विभाजन गर्ने भन्नेमा नेताहरु सहमत भएको उनले बताए ।

एमाले त मिलीसक्यो, कांग्रेसमा मतान्तर भएपनि एकजुट छ भने हामी किन विभाजित हुने भन्दै नेता यादवले अब सबै समस्याको हल सहमतिमा गर्न नेताहरु राजी भएको जानकारी दिएका छन् ।