आगामी ६ साताभित्र अमेरिकाले ८ करोड डोज खोप निर्यात गर्ने

४ जेठ, एजेन्सी । अमेरिकाले आगामी ६ साताभित्र ८ करोड डोज कोरोना खोप निर्यातको घोषणा गरेको छ । अमेरिकी राष्ट्रपति जो बाइडनले सोमबार सञ्चारमाध्यमहरुसँग कुरा गर्दै ६ करोड डोज कोरोना खोप अन्य मुलुकमा निर्यातको घोषणा गरेका हुन् ।

अहिले अमेरिकाले घोषणा गरेको खोपको संख्या अमेरिकाले जुनको अन्तिमसम्ममा उत्पादन गर्ने खोपको १३ प्रतिशत रहेको बाइडनले बताएका छन् । उनका अनुसार यससँगै अमेरिका विश्वमा सबैभन्दा धेरै कोरोना खोप अनुदानमा दिने मुलुक बन्ने बाइडनको दाबी छ ।

रुस र चीनले अहिलेसम्म एक करोड ५० लाख डोज कोरोना खोप अनुदानमा अन्य मुलुकलाई दिएका छन् । बाइडनले कोरोना खोपको विषयमा रुस र चीनको नाम धेरै सुनिएको भए पनि आफूहरु अब खोपमा विश्वको नेतृत्व गर्ने तर्फ अघि बढेको बाइडनको भनाइ छ ।

अमेरिकाले गत मार्चमा क्यानडा र मेक्सिकोलाई ४० लाख डोज अक्सफोर्ड–एस्ट्राजेनेकाको कोरोना खोप दिएको थियो । आगामी दिनमा थप ६ करोड डोज एस्ट्राजेनेकाको खोप अन्य मुलुकलाई दिने अमेरिकाले बताएको छ । यो खोपलाई अमेरिकामा प्रयोगको अनुमति दिइएको छैन ।

ह्वाइट हाउसकी प्रेस सेक्रेटरी जेन साकीले कुन मुलुकलाई कति खोप दिइने भन्ने निर्णय भने हुन बाँकी रहेको बीबीसीले जनाएको छ ।